អេម៉ាញូអែល
មានពេលមួយ ខ្ញុំបានជជែកជាមួយមិត្តភក្តិម្នាក់ ដែលជាគូស្វាមីថ្មោងថ្មី ហើយកំពុងអន្ទៈសារចង់បានកូន។ គាត់និងភរិយាគាត់ កំពុងរៀបផែនការ និងអធិស្ឋានសូមព្រះប្រទានកូនម្នាក់។ ពួកគេបានជ្រើសរើសឈ្មោះឲ្យកូននោះរួចជាស្រេចទៅហើយ ទោះភរិយារបស់គាត់មិនទាន់មានផ្ទៃពោះក៏ដោយ។
ក្នុងឆ្នាំ៧៣៥នៃគ្រីស្ទសគរាជ ហោរាអេសាយបានថ្លែងទំនាយ ឲ្យប្រជាជាតិយូដាស្តាប់ ពេលដែលពួកគេកំពុងមានការតយុទ្ធខាងវិញ្ញាណ។ គឺដូចដែលគាត់បានប្រកាសថា “ព្រះអម្ចាស់ទ្រង់នឹងប្រទានទីសំគាល់១មកអ្នករាល់គ្នា ដោយព្រះអង្គទ្រង់ មើល នាងព្រហ្មចារីនឹងមានគភ៌ប្រសូតបានបុត្រា១ ហើយនឹងឲ្យព្រះនាមថា អេម៉ាញូអែល(ដែលមានន័យថា ព្រះគង់នៅជាមួយយើង)”(អេសាយ ៧:១៤)។ ត្រង់ចំណុចនេះ គេបានដាក់ឈ្មោះឲ្យព្រះយេស៊ូវ តាំងពី៧៣០ឆ្នាំ មុនពេលទ្រង់ចាប់កំណើត!
ខ្ញុំបានឮគេនិយាយថា សេចក្តីពិតទាំងមូលនៃបុណ្យណូអែល គឺអាចបង្រួមមកត្រឹមពាក្យបីបួនម៉ាត់ថា “ព្រះគង់នៅជាមួយយើង”។ ក្នុងពេលបុណ្យណូអែល យើងច្រើនតែផ្តោតចិត្ត ទៅលើការប្រសូត្ររបស់ព្រះយេស៊ូវជាមនុស្ស។ ប៉ុន្តែ ការផ្តោតចិត្តដែលប្រសើរជាងនេះ គឺជាការផ្តោតទៅលើភាពជាព្រះរបស់ទ្រង់ ទៅលើភាពពិតរបស់ទ្រង់ ដែលជា “ព្រះគង់នៅជាមួយយើង”។
អេម៉ាញូអែល មានន័យថា យើងមិននៅដាច់ឆ្ងាយពីព្រះវត្តមានព្រះ ដែលគង់នៅលើបល្ល័ង្កដែលជាកន្លែងដ៏សែនឆ្ងាយពីយើងនោះឡើយ។ ទ្រង់បានយាងមកគង់នៅជាមួយយើង។ ទ្រង់មានសាច់ និងស្បែកជាមនុស្ស ហើយបានស្លៀកពាក់ខោអាវមនុស្សផងដែរ។ ពេលដែលលោកយ៉ូសែប និងនាងម៉ារាបានហៅព្រះនាមទ្រង់ ដែលជាកូនរបស់ពួកគេ ការនេះបានរំឭកថា ព្រះទ្រង់គង់នៅក្នុងផ្ទះជាមួយពួកគេ។ តាមន័យត្រង់ គឺមានន័យថា ទ្រង់គង់នៅក្រោមដំបូងផ្ទះតែមួយជាមួយពួកគេ។
តើអ្នកមានអារម្មណ៍ឯកកោឬទេ? តើមានអារម្មណ៍ភ័យខ្លាចឬទេ? តើអ្នកមានអារម្មណ៍ថា ព្រះទ្រង់គង់នៅឆ្ងាយឈោងមិនដល់ ហើយទ្រង់កំពុងទតមើលអ្នកពីចម្ងាយឬ? ព្រះរាជសារនៃបុណ្យណូអែលសូមលើកទឹកចិត្តអ្នកថា អ្នកមិនចំាបាច់ត្រូវមានអារម្មណ៍ឯកោទៀតឡើយ ដ្បិតព្រះយេស៊ូវបានយាងមកហើយ។ ទ្រង់ជាអេម៉ាញូអែល ព្រះគង់នៅមួយយើង។-K.T.SIM
អេម៉ាញូអែលគឺមានន័យថា ព្រះគង់នៅជាមួយយើងខ្ញុំ។
មើល នាងព្រហ្មចារីនឹងមានគភ៌ប្រសូតបានបុត្រា១ ហើយនឹងឲ្យព្រះនាមថា អេម៉ាញូអែល(ដែលមានន័យថា “ព្រះគង់នៅចាមួយយើង”)។-អេសាយ ៧:១៤
បទគម្ពីរសម្រាប់អានថ្ងៃនេះ
អេសាយ ៧:១០-១៤
១០ ព្រះយេហូវ៉ាទ្រង់មានព្រះបន្ទូលនឹងអេហាសថា ១១ ចូរឯងសូមទីសំគាល់១ពីព្រះយេហូវ៉ា ជាព្រះនៃឯងចុះ ចូរសូម ទោះបើនៅក្នុងទីជំរៅ ឬនៅទីខ្ពស់ខាងលើក្តី ១២ តែអេហាសតបថា យើងមិនព្រមសូមទេ ក៏មិនព្រមល្បងលព្រះយេហូវ៉ាឡើយ ១៣ ដូច្នេះ អេសាយទូលថា ឱពូជពង្សរបស់ដាវីឌអើយ ចូរស្តាប់ឥឡូវចុះ ការដែលអ្នករាល់គ្នាធ្វើឲ្យរំខានចិត្តមនុស្ស នោះតើជាការតូចឬអី បានជាចង់រំខានដល់ព្រះហឫទ័យនៃព្រះរបស់ទូលបង្គំទៀតផង ១៤ ដូច្នេះព្រះអម្ចាស់ទ្រង់នឹងប្រទានទីសំគាល់១មកអ្នករាល់គ្នា ដោយព្រះអង្គទ្រង់ មើល នាងព្រហ្មចារីនឹងមានគភ៌ប្រសូតបានបុត្រា១ ហើយនឹងឲ្យព្រះនាមថា អេម៉ាញូអែល។
លោកអ្នកអាចវិលត្រឡប់ទៅកាន់ទំព័រដើមរបស់គេហទំព័រ អំណោយនៃព្រះគុណរបស់ព្រះ ដើម្បីមើលអត្ថបទ និងធនធានដទៃទៀត