ជ្រើសរើសយកឆ្កែចចក ឬកូនចៀម
អាន : ម៉ាថាយ ២៧:១៥-២៦
ក្នុងមនុស្ស២នាក់នេះ តើចង់ឲ្យខ្ញុំលែងអ្នកណា គេឆ្លើយឡើងថា សូមលែងបារ៉ាបាសចុះ។-ខ.២១
ពួកបណ្តាជនបានជួបជុំគ្នា ហើយពួកគេចង់ឲ្យគេដោះលែងមនុស្សម្នាក់។ នៅសម័យព្រះយេស៊ូវ ក្នុងអំឡុងពេលបុណ្យរំលង គេមានប្រពៃណី ដោះលែងអ្នកទោសម្នាក់ ឲ្យមានសេរីភាព ដើម្បីធ្វើជាការរំឭកអំពីការរំដោះជនជាតិអ៊ីស្រាអែល ឲ្យរួចផុតពីចំណងនៃទាសភាព ក្នុងនគរអេស៊ីព្ទ។
លោកពីឡាត់មិនមែនជាអ្នកនយោបាយដែលខ្វះបទពិសោធន៍ឡើយ។ បានជាគាត់ឲ្យហ្វូងមនុស្សទាំងនោះធ្វើការសម្រេចចិត្ត ជ្រើសរើសអង្គបុគ្គលដែលបានប្រោសលោកឡាសាឲ្យរស់ឡើងវិញ ឬជ្រើសរើសមនុស្សម្នាក់ដែលបានសម្លាប់មនុស្សជាច្រើន។ ពួកគេដឹងច្បាស់ណាស់ថា គួរជ្រើសរើសយកអ្នកណា។ តែពួកគេនៅតែជ្រើសរើសយកប៉ារ៉ាបាស ដែលជាឃាតករ។
ច្បាប់របស់ហ្វូងមនុស្សតែងតែជ្រើសយកមនុស្សអាក្រក់ ដែលបះបោរ និងមានរោគចិត្ត។ ពួកគេបានជ្រើសរើសឆ្កែចចក ដែលមានសណ្ឋានអាក្រក់ដូចបារ៉ាបាស ស្តាលីន ហ៊ីត្លៃ ដែលមានក្នុងលោកិយនេះ។ ពួកគេបដិសេធន៍មនុស្សដែលតូចទៀប ដែលបន្ទាបខ្លួន ដែលជាអ្នកបម្រើ និងកូនចៀមនៃព្រះ។
បើសិនជាយើងនៅក្នុងចំណោមហ្វូងមនុស្ស នៅថ្ងៃដែលគេកាត់ទោសទ្រង់ តើយើងនឹងជ្រើសរើសយកអ្នកណា? យើងចូលចិត្តជឿថា យើងនឹងជ្រើសរើសព្រះយេស៊ូវ។ ប៉ុន្តែ តើយើងនឹងជ្រើសរើសយកទ្រង់មែនទេ? សម្រែករបស់ហ្វូងមនុស្សគឺពិតជាមានអំណាចណាស់។ រយៈពេលពីរបីថ្ងៃ មុនពេលគេកាត់ទោសទ្រង់ ពួកបណ្តាជនដដែលនោះបានស្រែកឡើងថា “ហូសាណា ដល់ ព្រះរាជបុត្រានៃស្តេចដាវីឌ!” តែពេលនេះ ពួកគេបែរជាស្រែកថា “ឆ្កាងវាទៅ!” សម្ពាធរបស់ហ្វូងមនុស្ស អាចធ្វើឲ្យយើងភ័ន្តច្រឡំ ភ័យខ្លាច ហើយទាញយើងឲ្យចូលរួមជាមួយពួកគេដែរ។
ឱព្រះអង្គអើយ សូមជួយយើងខ្ញុំ។ ជួនកាល ក្នុងចំណោមហ្វូងមនុស្ស ទោះជាយើងដឹងថា យើងត្រូវធ្វើអ្វីក៏ដោយ ក៏យើងនៅតែត្រូវបានល្បួងឲ្យជ្រើសរើសយកឆ្កែចចក ជាជាងរើសយកកូនចៀមនៃព្រះ។ សូមជួយឲ្យយើងខ្ញុំ ជ្រើសរើសយកកូនចៀមនៃព្រះ។-Dave Egner
លោកិយ នឹងព្យាយាមដាក់សម្ពាធយើងឲ្យចូលទៅក្នុងការគ្រប់គ្រងរបស់វា
តែដោយមានជំនួយពីព្រះ នោះយើងអាចតតាំង
បើសិនជាយើងកាន់ជាប់តាមសេចក្តីពិតរបស់ទ្រង់។-Sper
ដើម្បីប្រឆាំងនឹងសម្ពាធរបស់លោកិយ ចូរពឹងផ្អែកលើអំណាចនៃព្រះអម្ចាស់ចុះ។
ការអានបទគម្ពីរសម្រាប់ថ្ងៃនេះ – ម៉ាថាយ ២៧:១៥-២៦
១៥ ឯនៅបុណ្យនោះ លោកចៅហ្វាយតែងធ្លាប់លែងអ្នកទោសម្នាក់ ឲ្យដល់ហ្វូងមនុស្ស តាមគេសូម ១៦ នៅគ្រានោះ គេមានអ្នកទោសម្នាក់ ដែលមានល្បីឈ្មោះៗបារ៉ាបាស ១៧ ដូច្នេះ កាលគេបានប្រជុំគ្នាជាស្រេច នោះលោកពីឡាត់សួរថា តើអ្នករាល់គ្នាចង់ឲ្យខ្ញុំលែងឈ្មោះណា បារ៉ាបាស ឬយេស៊ូវ ដែលហៅថា ព្រះគ្រីស្ទ ១៨ ដ្បិតលោកបានជ្រាបថា គេបញ្ជូនទ្រង់ដោយចិត្តឈ្នានីសទេ ១៩ កាលលោកកំពុងតែអង្គុយនៅក្នុងទីកាត់ក្តី នោះប្រពន្ធលោកប្រើបំរើមកជំរាបថា កុំឲ្យធ្វើអ្វីដល់មនុស្សសុចរិតនោះឡើយ ដ្បិតនៅថ្ងៃនេះ ខ្ញុំបានយល់សប្តិកើតទុក្ខជាច្រើន ដោយព្រោះមនុស្សនោះ ២០ តែពួកសង្គ្រាជ និងពួកចាស់ទុំ គេបញ្ចេះហ្វូងមនុស្ស ឲ្យសូមបារ៉ាបាសវិញ ហើយឲ្យបំផ្លាញព្រះយេស៊ូវបង់ ២១ នោះលោកចៅហ្វាយចាប់ពាក្យសួរគេថា ក្នុងមនុស្ស២នាក់នេះ តើចង់ឲ្យខ្ញុំលែងអ្នកណា គេឆ្លើយឡើងថា សូមលែងបារ៉ាបាសចុះ ២២ លោកពីឡាត់សួរគេថា ដូច្នេះ តើឲ្យខ្ញុំធ្វើអ្វីដល់យេស៊ូវ ដែលហៅជាព្រះគ្រីស្ទនេះ អ្នកទាំងអស់គ្នាក៏ឆ្លើយឡើងថា ចូរឆ្កាងវាទៅ ២៣ នោះលោកចៅហ្វាយសួរថា តើអ្នកនេះបានធ្វើខុសអ្វី តែគេស្រែកកាន់តែខ្លាំងឡើងថា ចូរឆ្កាងវាទៅ ២៤ កាលលោកពីឡាត់ឃើញថា មិនឈ្នះទេ កើតមានកោលាហលកាន់តែខ្លាំងឡើងដូច្នោះ នោះលោកយកទឹកមកលាងដៃ នៅមុខហ្វូងមនុស្ស ទាំងមានប្រសាសន៍ថា ខ្ញុំគ្មានទោសនឹងឈាមនៃអ្នកសុចរិតនេះទេ ការនេះស្រេចនៅអ្នករាល់គ្នាចុះ ២៥ បណ្តាជនទាំងអស់គ្នាក៏ឆ្លើយឡើងថា ចូរឲ្យឈាមវាធ្លាក់មកលើយើងរាល់គ្នា និងកូនចៅរបស់យើងចុះ ២៦ ដូច្នេះ លោកក៏លែងបារ៉ាបាសឲ្យដល់គេ ឯព្រះយេស៊ូវវិញ កាលគេបានវាយនឹងរំពាត់រួចហើយ នោះក៏បញ្ជូនទៅឲ្យគេឆ្កាងទ្រង់។