មូលហេតុចម្បង
ព្រះយេស៊ូវបានកែតម្រង់ទស្សនៈដ៏ស្រពិចស្រពិល ដែលខ្ញុំមានចំពោះព្រះ។ ទ្រង់បានបើកសម្តែងឲ្យយើងស្គាល់ព្រះមួយអង្គ ដែលបានយាងចុះមករកយើងរាល់គ្នា ទ្រង់ជាព្រះដែលបានរំដោះយើងឲ្យមានសេរីភាព ហើយដែលប្រសើរបំផុតនោះ គឺទ្រង់ជាព្រះនៃសេចក្តីស្រឡាញ់។
អ្នកដែលបានចម្រើវ័យធំឡើង ក្នុងគ្រួសារគ្រីស្ទបរិស័ទ អាចមានអារម្មណ៍ធម្មតា ចំពោះព្រះរាជសាររបស់ព្រះយេស៊ូវ។ ពួកគេប្រហែលជាមិនមានអារម្មណ៍ភ្ញាក់ផ្អើលទេ ហើយពួកគេប្រហែលមិនទាន់យល់ថា ទំនាក់ទំនងរវាងមនុស្សនឹងព្រះ ជាទំនាក់ទំនងនៃសេចក្តីស្រឡាញ់ទេ។ លោកអារីស្តូត ដែលជាអ្នកប្រាជ្ញជនជាតិក្រិក បានលើកឡើងថា “វាជារឿងចម្លែក បើសិនជាមនុស្សម្នាក់អៈអាងថាខ្លួនស្រឡាញ់ព្រះហ្ស៊ូស(Zeus ព្រះរបស់សាសន៍ក្រិក)”។ ប៉ុន្តែ វាក៏ជារឿងចម្លែកដែរ បើសិនជាគេថា ព្រះហ្ស៊ូសស្រឡាញ់មនុស្ស។ យ៉ាងណាមិញ ព្រះគម្ពីររបស់គ្រីស្ទបរិស័ទបានលើកឡើងថា សេចក្តីស្រឡាញ់ជាមូលហេតុ ដែលព្រះយេស៊ូវបានយាងចុះមកផែនដី។ គឺដូចមានសេចក្តីចែងថា “សេចក្តីស្រឡាញ់របស់ព្រះបានសំដែងមក ឲ្យយើងខ្ញុំស្គាល់ ដោយទ្រង់ចាត់ព្រះរាជបុត្រាទ្រង់តែ១ ឲ្យមកក្នុងលោកីយ៍ ដើម្បីឲ្យយើងរាល់គ្នាបានរស់ដោយសារទ្រង់”(១យ៉ូហាន ៤:៩)។
ខ្ញុំនៅចាំពេលដែលខ្ញុំកំពុងអង្គុយរង់ចាំជិះយន្តហោះ នៅអាកាសយាន្ដដ្ឋាន។ កាលនោះ ខ្ញុំក៏បានឆ្លៀតពេលនិពន្ធសៀវភៅដែលមានចំណងជើងថា ការខកចិត្តចំពោះព្រះ ហើយខ្ញុំមានចិត្តឈឺឆ្អាល ចំពោះអ្នកដែលមានសេចក្តីទុក្ខ និងការសង្ស័យ ក៏ដូចជាចំពោះអ្នកដែលសេចក្តីអធិស្ឋានមិនបានទទួលការឆ្លើយតប។
អ្នកស្រីខារែន(Karen) ជាមិត្តភក្តិរបស់ខ្ញុំ។ មានពេលមួយគាត់បានធ្វើដំណើរទៅចូលរួចសន្និសិទដូចខ្ញុំដែរ។ គាត់ធ្លាប់តែស្តាប់ខ្ញុំនិយាយ ដោយមិននិយាយអ្វីតបមកខ្ញុំវិញ តាំងពីយូរមកហើយ ហើយនៅថ្ងៃនោះ គាត់ស្រាប់តែសួរខ្ញុំថា “ភីលីព តើអ្នកធ្លាប់អនុញ្ញាតឲ្យព្រះស្រឡាញ់អ្នកទេ? ខ្ញុំគិតថា នេះជារឿងសំខាន់ណាស់”។
ពេលនោះខ្ញុំក៏បានដឹងថា ខ្ញុំបានមើលរំលងព្រះរាជសារដ៏សំខាន់បំផុតនៃជំនឿរបស់គ្រីស្ទបរិស័ទ ដែលបានថ្លែងប្រាប់ថា រឿងរបស់ព្រះយេស៊ូវ ជារឿងនៃសេចក្តីស្រឡាញ់។ ជាការពិតណាស់ រឿងនេះមានការទាក់ទងនឹងការឈឺចាប់ និងការខកចិត្ត។ ប៉ុន្តែ ព្រះយេស៊ូវបានសម្រេចព្រះបន្ទូលសន្យារបស់ព្រះមួយអង្គ ដែលនឹងប្រមូលក្រុមគ្រួសាររបស់ទ្រង់មកវិញ ទោះជាមានការលះបង់យ៉ាងក៏ដោយ។-PHILIP YANCEY
សេចក្តីស្រឡាញ់ គឺជាការដែលព្រះយាងមកយកកំណើតជាមនុស្ស។-WALVOORD
១យ៉ូហាន ៤:៩
សេចក្តីស្រឡាញ់របស់ព្រះបានសំដែងមក ឲ្យយើងខ្ញុំស្គាល់ ដោយទ្រង់ចាត់ព្រះរាជបុត្រាទ្រង់តែ១ ឲ្យមកក្នុងលោកីយ៍ ដើម្បីឲ្យយើងរាល់គ្នាបានរស់ដោយសារទ្រង់។
ការអានបទគម្ពីរសម្រាប់ថ្ងៃនេះ
១យ៉ូហាន ៤:១-៩
១ ពួកស្ងួនភ្ងាអើយ កុំឲ្យជឿគ្រប់ទាំងវិញ្ញាណឡើយ ចូរល្បងវិញ្ញាណទាំងអស់វិញ ដើម្បីឲ្យបានដឹងជាមកពីព្រះ ឬមិនមែន ដ្បិតមានហោរាក្លែងក្លាយជាច្រើនកើតមកក្នុងលោកីយ៍នេះហើយ ២ យើងនឹងសំគាល់ព្រះវិញ្ញាណនៃព្រះបានដូច្នេះ គឺអស់ទាំងវិញ្ញាណណាដែលថ្លែងប្រាប់ថា ព្រះយេស៊ូវគ្រីស្ទបានមកក្នុងសាច់ឈាម គឺវិញ្ញាណនោះហើយ ដែលមកពីព្រះ ៣ តែវិញ្ញាណណាដែលមិនព្រមថា ព្រះយេស៊ូវគ្រីស្ទបានមកក្នុងសាច់ឈាមទេ នោះមិនមែនមកពីព្រះឡើយ គឺជាវិញ្ញាណអាទទឹងព្រះគ្រីស្ទវិញ ដែលអ្នករាល់គ្នាបានឮនិយាយថា ត្រូវមក តែឥឡូវនេះ ក៏នៅក្នុងលោកីយ៍ហើយ ៤ ពួកកូនតូចៗ អើយ អ្នករាល់គ្នាមកពីព្រះ ហើយក៏ឈ្នះវិញ្ញាណទាំងនោះដែរ ពីព្រោះព្រះដែលគង់ក្នុងអ្នករាល់គ្នា នោះទ្រង់ធំជាងអានោះ ដែលនៅក្នុងលោកីយ៍ផង ៥ ពួកនោះមកពីលោកីយ៍ទេ ដោយហេតុនោះបានជាគេនិយាយតាមភាពលោកីយ៍ ហើយលោកីយ៍ក៏ស្តាប់គេដែរ ៦ ឯយើងរាល់គ្នា ជាអ្នកមកពីព្រះវិញ ហើយអ្នកណាដែលស្គាល់ព្រះនោះក៏ស្តាប់យើងខ្ញុំ តែអ្នកណាដែលមិនមកពីព្រះទេ នោះមិនព្រមស្តាប់យើងខ្ញុំឡើយ គឺយ៉ាងនោះឯង ដែលយើងនឹងស្គាល់វិញ្ញាណនៃសេចក្តីពិត និងវិញ្ញាណនៃសេចក្តីខុសឆ្គងទៅបាន។
៧ ពួកស្ងួនភ្ងាអើយ យើងត្រូវស្រឡាញ់គ្នាទៅវិញទៅមក ដ្បិតសេចក្តីស្រឡាញ់មកពីព្រះ ឯអស់អ្នកណាដែលមានសេចក្តីស្រឡាញ់ នោះឈ្មោះថាមកពីព្រះ ហើយក៏ស្គាល់ទ្រង់ដែរ ៨ តែអ្នកណាដែលគ្មានសេចក្តីស្រឡាញ់ នោះមិនស្គាល់ព្រះវិញ ពីព្រោះព្រះទ្រង់ជាសេចក្តីស្រឡាញ់នោះឯង ៩ សេចក្តីស្រឡាញ់របស់ព្រះបានសំដែងមក ឲ្យយើងខ្ញុំស្គាល់ ដោយទ្រង់ចាត់ព្រះរាជបុត្រាទ្រង់តែ១ ឲ្យមកក្នុងលោកីយ៍ ដើម្បីឲ្យយើងរាល់គ្នាបានរស់ដោយសារទ្រង់។
លោកអ្នកអាចវិលត្រឡប់ទៅកាន់ទំព័រដើមរបស់គេហទំព័រ អំណោយនៃព្រះគុណរបស់ព្រះ ដើម្បីមើលអត្ថបទ និងធនធានដទៃទៀត