អំណោយដែលល្អបំផុត
នៅក្នុងដំណើរកម្សាន្តរដូវរងា ក្នុងភាគខាងជើងនៃរដ្ឋញូអ៊ីងគ្លិន មានបុរសម្នាក់សួរសំណួរមួយថា “តើអ្នកចង់បានអំណោយអ្វីជាងគេ ក្នុងរដូវកាលបុណ្យណូអែល?”
មានកីឡាករម្នាក់ ហាក់ដូចជាមានចិត្តអន្ទះសារចង់ឆ្លើយសំណួរនេះណាស់។
គាត់ក៏មើលទៅមិត្តភក្តិដែលអង្គុយក្បែរគាត់ ហើយនិយាយថា “សំណួរនេះស្រួលឆ្លើយទេ។ កាលពីពីរបីឆ្នាំមុន ពេលខ្ញុំរៀនចប់មហាវិទ្យាល័យ ខ្ញុំគិតថា ខ្ញុំនឹងក្លាយជាកីឡាករបាល់ទាត់អាជីព។ តែក្តីស្រមៃមិនក្លាយជាពិត ខ្ញុំក៏មានកំហឹងក្នុងចិត្ត។ ភាពល្វីងជូរចត់បានស៊ីបំផ្លាញខ្ញុំ ហើយខ្ញុំក៏បានចែកចាយ អំពីភាពល្វីងជូរចត់នេះ ដល់អ្នកណាដែលព្យាយាមជួយលើកទឹកចិត្តខ្ញុំ”។ “ក្នុងអំឡុងពេលរដូវកាលទីពីរ នៃការរស់នៅ ដោយគ្មានបាល់ទាត់ ខ្ញុំក៏បានទៅមើលការសម្តែងរឿងបុណ្យណូអែល នៅព្រះវិហាររបស់បុរសម្នាក់នេះ” និយាយបណ្តើរ គាត់ក៏ចង្អុលទៅមិត្តភក្តិដែលអង្គុយក្បែរគាត់នោះ។ គាត់ក៏បន្តទៀតថា “ខ្ញុំបានទៅព្រះវិហារ មិនមែនដើម្បីស្វែងយល់ពីព្រះយេស៊ូវទេ តែគ្រាន់តែចង់មើលក្មួយស្រីខ្ញុំសម្តែងប៉ុណ្ណោះ។ ខ្ញុំពិបាកនឹងរៀបរាប់ អំពីការអ្វីដែលកើតឡើងបន្ទាប់ ព្រោះខ្ញុំមានអារម្មណ៍ចម្លែក ប៉ុន្តែ ពេលដែលគេកំពុងសម្តែងរឿង ខ្ញុំមានអារម្មណ៍ថា ខ្ញុំចាំបាច់ត្រូវចូលរួមជាមួយពួកអ្នកគង្វាល និងពួកទេវតា ដែលកំពុងចូលគាល់ព្រះឱរសយេស៊ូវ។ ពេលដែលហ្វូងមនុស្សបន្លឺសម្លេងព្រមគ្នាថា ‘យប់ដ៏ស្ងប់ស្ងាត់’ ខ្ញុំក៏បានអង្គុយយំ។”
“ខ្ញុំបានទទួលអំណោយណូអែលដ៏ល្អបំផុត នៅយប់ថ្ងៃនោះ” ហើយគាត់ក៏ចង្អុលទៅមិត្តភក្តិគាត់ រួចនិយាយទៀតថា “បុរសម្នាក់នេះ បានជូនក្រុមគ្រួសារគាត់ទៅផ្ទះ ហើយគាត់ក៏មានឱកាសប្រាប់ខ្ញុំ ពីរបៀបចូលគាត់ព្រះយេស៊ូវ”។
ក្នុងរដូវកាលនៃបុណ្យណូអែលឆ្នាំនេះ សូមឲ្យភាពសាមញ្ញដ៏មានអំណរ នៃរឿងកំណើតព្រះយេស៊ូវ ធ្វើការក្នុងចិត្តយើង ឲ្យចង់ស្គាល់ទ្រង់កាន់តែច្បាស់។-RANDY KILGORE
អំណោយណូអែលដែលល្អបំផុត គឺសន្តិភាព និងការអត់ទោសបាប ដែលព្រះយេស៊ូវបានយាងចុះមកប្រទានដល់យើង។
១របាក្សត្រ ១៦:៨
ចូរអរព្រះគុណដល់ព្រះយេហូវ៉ា ចូរអំពាវនាវដល់ព្រះនាមទ្រង់ចុះ ចូរសំដែងពីអស់ទាំងការនៃទ្រង់ នៅកណ្តាលគ្រប់ទាំងសាសន៍។
បទគម្ពីរសម្រាប់អានថ្ងៃនេះ
១របាក្សត្រ ១៦:៨-១៣
៨ ចូរអរព្រះគុណដល់ព្រះយេហូវ៉ា ចូរអំពាវនាវដល់ព្រះនាមទ្រង់ចុះ ចូរសំដែងពីអស់ទាំងការនៃទ្រង់ នៅកណ្តាលគ្រប់ទាំងសាសន៍ ៩ ចូរច្រៀងថ្វាយទ្រង់ ចូរច្រៀងសរសើរដល់ទ្រង់ចុះ ចូរនឹកថ្លែងពីអស់ទាំងការអស្ចារ្យរបស់ទ្រង់ ១០ ចូរមានចិត្តរីករាយ ដោយនូវព្រះនាមបរិសុទ្ធរបស់ទ្រង់ ចូរឲ្យអស់អ្នក ដែលស្វែងរកព្រះយេហូវ៉ា មានចិត្តអរសប្បាយឡើង ១១ ចូរសង្កិនរកព្រះយេហូវ៉ា និងឥទ្ធានុភាពរបស់ទ្រង់ ចូររកព្រះភក្ត្រទ្រង់ជានិច្ច ១២ ចូរនឹកចាំពីអស់ទាំងការអស្ចារ្យ ដែលទ្រង់បានធ្វើ គឺពីការចំឡែករបស់ទ្រង់ និងពីសេចក្តីយុត្តិធម៌ដែលចេញពីព្រះឱស្ឋទ្រង់មក ១៣ ឱអ្នករាល់គ្នាជាពូជពង្សអ៊ីស្រាអែល ជាពួកបំរើទ្រង់ គឺពួកកូនចៅយ៉ាកុប ជាពួកអ្នកជ្រើសរើសរបស់ទ្រង់អើយ។
លោកអ្នកអាចវិលត្រឡប់ទៅកាន់ទំព័រដើមរបស់គេហទំព័រ អំណោយនៃព្រះគុណរបស់ព្រះ ដើម្បីមើលអត្ថបទ និងធនធានដទៃទៀត