ដើមឈើនៃព្រះពរ
ខ្ញុំធ្លាប់បានអានរឿងមួយ ដែលនិយាយអំពីប្តីប្រពន្ធថ្មោងថ្មីមួយគូ ដែលបរាជ័យ នៅក្នុងមុខជំនួញ ហើយពួកគេនៅសល់លុយតិចតួច សម្រាប់ប្រារព្ធពិធីបុណ្យណូអែល។ ពួកគេត្រូវរើចេញពីផ្ទះរបស់ពួកគេ បន្ទាប់ពីឆ្នាំថ្មីចូលមកដល់។ ប៉ុន្តែ ពួកគេមិនចង់ឲ្យរដូវកាលនៃបុណ្យណូអែលរបស់ពួកគេ ទទួលផលប៉ះពាល់ ដោយសាររឿងនេះឡើយ។ ដូចនេះ ពួកគេក៏បានសម្រេចចិត្តធ្វើពិធីជប់លៀងមួយ ដើម្បីអបអរបុណ្យណូអែល។ ពេលភ្ញៀវមកដល់ ពួកគេក៏បានឃើញដើមស៊ីដាមួយដើម ត្រូវបានតុបតែង ទៅដោយអំពូលភ្លើងតូចៗមួយខ្សែ និងក្រដាស់រមូលតូចៗជាច្រើន ចងភ្ជាប់នឹងមែក ដោយខ្សែបូ។ ប្តីប្រពន្ធមួយគូនេះក៏បាននិយាយទៅកាន់ពួកគេថា “ដើមឈើនៃព្រះពរ សូមស្វាគមន៍! ទោះគ្រួសារយើងស្ថិតក្នុងពេលដ៏ពិបាកក៏ដោយ ក៏ព្រះទ្រង់នៅតែប្រទានពរយើង តាមរបៀបជាច្រើន បានជាយើងតុបតែងដើមឈើរបស់យើងថ្វាយទ្រង់។ នៅក្នុងក្រដាស់រមូលតូចៗដែលយើងបានចង់ព្យួរនឹងមែកឈើ គឺមានសរសេររៀបរាប់ អំពីព្រះពរនីមួយៗ ដែលទ្រង់បានប្រទានយើង ក្នុងឆ្នាំនេះ”។
ចាប់តាំងពីពេលនោះមក អ្នកទាំងពីរនៅបន្តជួបទុក្ខលំបាកជាច្រើនទៀត តែពួកគេនៅតែសម្រេចចិត្តថា ខ្លួននឹងផ្តោតចិត្តទៅលើព្រះអម្ចាស់ជានិច្ច។ ជាញឹកញាប់ ពួកគេបាននិយាយប្រាប់គេថា ការប្រារព្ធធ្វើពិធីបុណ្យណូអែលដែលមានការដាក់តាំង “ដើមឈើនៃព្រះពរ” ស្ថិតនៅក្នុងចំណោមការប្រារព្ធធ្វើដែលមានភាពស្រស់ស្អាតបំផុត សម្រាប់ពួកគេ ព្រោះពួកគេអាចទទួលស្គាល់ ដូចនាងម៉ារាថា “វិញ្ញាណខ្ញុំក៏រីករាយនឹងព្រះដ៏ជាព្រះអង្គសង្គ្រោះនៃខ្ញុំ … ពីព្រោះព្រះដ៏មានព្រះចេស្តា ទ្រង់បានប្រោសសេចក្តីយ៉ាងល្អវិសេសដល់ខ្ញុំ ព្រះនាមទ្រង់បរិសុទ្ធ”(លូកា ១:៤៧-៤៩)។
ទោះអ្នកមានទុក្ខលំបាកអ្វីក៏ដោយ ចូរកុំបណ្តោយឲ្យទុក្ខលំបាកទាំងនោះ មានផលប៉ះពាល់ដល់ការប្រារព្ធធ្វើពិធីបុណ្យណូអែលរបស់អ្នកឡើយ ដ្បិតគ្មានអ្វីអាចមានផលប៉ះពាល់មកលើពិធីបុណ្យណូអែលឡើយ! ចូរផ្តោតទៅលើព្រះយេស៊ូវ ហើយស្វែងរកវិធីចែករំលែកព្រះពររបស់ទ្រង់ ជាមួយអ្នកដទៃ ដែលអ្នកប្រហែលជាអាចធ្វើ តាមរយៈ “ដើមឈើនៃព្រះពរ” របស់អ្នក។-JOANIE YODER
ដើម្បីឲ្យការប្រារព្ធពិធីបុណ្យណូអែលរបស់អ្នកមានន័យ ចូរយកព្រះគ្រីស្ទជាទីមួយ។
លូកា ១:៤៩
ពីព្រោះព្រះដ៏មានព្រះចេស្តា ទ្រង់បានប្រោសសេចក្តីយ៉ាងល្អវិសេសដល់ខ្ញុំ ព្រះនាមទ្រង់បរិសុទ្ធ។
ការអានបទគម្ពីរ សម្រាប់ថ្ងៃនេះ
លូកា ១:៤៦-៥៥
៤៦ រួចម៉ារានិយាយឡើងថា “ព្រលឹងខ្ញុំលើកដំកើងព្រះអម្ចាស់ ៤៧ វិញ្ញាណខ្ញុំក៏រីករាយនឹងព្រះដ៏ជាព្រះអង្គសង្គ្រោះនៃខ្ញុំ ៤៨ ដ្បិតទ្រង់បានទតមើលសណ្ឋានទាបថោករបស់ខ្ញុំ ជាបាវបំរើទ្រង់ មើលចុះ ពីនេះទៅមុខ គ្រប់ទាំងដំណមនុស្សនឹងរាប់ខ្ញុំថា ជាអ្នកមានពរ ៤៩ ពីព្រោះព្រះដ៏មានព្រះចេស្តា ទ្រង់បានប្រោសសេចក្តីយ៉ាងល្អវិសេសដល់ខ្ញុំ ព្រះនាមទ្រង់បរិសុទ្ធ ៥០ ទ្រង់មានសេចក្តីមេត្តាករុណាដល់គ្រប់ទាំងដំណមនុស្ស ដែលគេកោតខ្លាចទ្រង់តរៀងទៅ ៥១ ទ្រង់បានសំដែងឫទ្ធិ ដោយព្រះហស្តទ្រង់ ព្រមទាំងកំចាត់កំចាយមនុស្សអំនួត ដោយសារគំនិតដែលនៅក្នុងចិត្តខ្លួនគេ ៥២ ទាំងទំលាក់ស្តេចពីបល្ល័ង្កចេញ ហើយលើកមនុស្សរាបសាឡើងវិញ ៥៣ ឯមនុស្សឃ្លាន ទ្រង់បានចំអែតដោយរបស់ល្អ តែពួកអ្នកមាន ទ្រង់បានបណ្តេញឲ្យទៅទទេវិញ ៥៤ ទ្រង់បានជួយអ៊ីស្រាអែល ជាអ្នកបំរើទ្រង់ ឲ្យបាននឹកចាំពីសេចក្តីមេត្តាករុណាទ្រង់ ៥៥ ដូចជាទ្រង់មានព្រះបន្ទូលនឹងពួកឰយុកោយើង គឺនឹងលោកអ័ប្រាហាំ ហើយនឹងពូជលោកជារៀងរាបដរាបតមក”។
លោកអ្នកអាចវិលត្រឡប់ទៅកាន់ទំព័រដើមរបស់គេហទំព័រ អំណោយនៃព្រះគុណរបស់ព្រះ ដើម្បីមើលអត្ថបទ និងធនធានដទៃទៀត