ដំណឹងល្អ!
ពត៌មានអន្តរជាតិបានវាយលុកមកលើយើង តាមអ៊ីនធើណិត ទូរទស្សន៍ វិទ្យុ និងទូរស័ព្ទដៃទំនើប។ ភាគច្រើននៃពត៌មានទាំងនោះ ជាដំណឹងអាក្រក់ ដែលហាក់ដូចជារៀបរាប់អំពីបញ្ហាដែលបាន ឬកំពុងកើតឡើង ដូចជាអំពើឧក្រឹដ្ឋ សង្រ្គាម ភារវៈកម្ម និងវិបត្តិសេដ្ឋកិច្ចជាដើម។ តែក៏មានពេលដែលដំណឹងល្អបានជ្រាតចូល ក្នុងពេលដែលងងឹតបំផុត នៃទុក្ខព្រួយ និងភាពអស់សង្ឃឹម។ ដំណឹងល្អទាំងនោះ មានពត៌មានដែលនិយាយអំពីបុគ្គលដែលជួយអ្នកដទៃ ដោយមិនគិតប្រយោជន៍ខ្លួនឯង ឬពត៌មានអំពីការរកឃើញដំណោះស្រាយផ្នែកវេជ្ជសាស្ត្រ ឬមួយពត៌មានអំពីការបោះជំហានទៅរកសន្តិភាព ក្នុងតំបន់ដែលមានសង្រ្គាម។
បញ្ហានេះបានធ្វើឲ្យខ្ញុំនឹកចាំ អំពីពាក្យសម្តីរបស់បុរសពីរនាក់ ដែលបានកត់ទុកក្នុងព្រះគម្ពីរសញ្ញាចាស់ ដែលបាននាំមកនូវក្តីសង្ឃឹមដ៏អស្ចារ្យ ដល់អ្នកដែលនឿយព្រួយ ដោយសារសង្រ្គាម។ ហោរាណាហ៊ុមបានពិពណ៌នា អំពីការជំនុំជម្រះរបស់ព្រះ មកលើប្រជាជាតិដែលសាហាវព្រៃផ្សៃ និងមានអំណាច ហើយទន្ទឹមនឹងនោះ គាត់ក៏បានមានថ្លែងបទទំនាយថា “មើលន៍ នៅលើភ្នំទាំងឡាយ ឃើញជើងរបស់អ្នកដែលនាំដំណឹងល្អមក គឺជាអ្នកដែលប្រកាសប្រាប់ពីសេចក្តីសុខ!”(ណាហ៊ុម ១:១៥)។ ដំណឹងល្អនោះ បាននាំមកនូវក្តីសង្ឃឹម ដល់អ្នកដែលទទួលរងការគាបសង្កត់ ដោយសារភាពសាហាវព្រៃផ្សៃ។
យ៉ាងណាមិញ ហោរាអេសាក៏បានថ្លែងនូវបទទំនាយស្រដៀងនឹងហោរាណាហ៊ុមផងដែរថា “អើ ល្អណាស់ហ្ន៎ គឺជើងនៃអ្នកនោះដែលដើរលើភ្នំ ជាអ្នកដែលនាំដំណឹងល្អមក ហើយប្រកាសប្រាប់ពីសេចក្តីមេត្រី ជាអ្នកដែលនាំដំណឹងល្អពីការប្រសើរមក ហើយថ្លែងប្រាប់ពីសេចក្តីសង្គ្រោះ គឺជាអ្នកដែលពោលដល់ក្រុងស៊ីយ៉ូនថា ព្រះនៃឯងទ្រង់សោយរាជ្យ”(អេសាយ ៥២:៧)។
បទទំនាយរបស់លោកណាហ៊ុម និងលោកអេសាយ ដែលនាំមកនូវសេចក្តីសង្ឃឹម បានសម្រេច នៅថ្ងៃបុណ្យណូអែលមុនបំផុត ពេលដែលពួកទេវតាប្រាប់ពួកអ្នកគង្វាលចៀមថា “កុំខ្លាចអី មើល ខ្ញុំមកប្រាប់ដំណឹងល្អដល់អ្នករាល់គ្នា ពីសេចក្តីអំណរយ៉ាងអស្ចារ្យ ដែលសំរាប់បណ្តាជនទាំងអស់គ្នា ដ្បិតនៅថ្ងៃនេះ មានព្រះអង្គសង្គ្រោះ១អង្គ ប្រសូតដល់អ្នករាល់គ្នានៅក្រុងហ្លួងដាវីឌ គឺជាព្រះគ្រីស្ទដ៏ជាព្រះអម្ចាស់”(លូកា ២:១០-១១)។
ជារៀងរាល់ថ្ងៃ ពត៌មាន ឬដំណឹងដែលសំខាន់បំផុត ក្នុងជីវិតយើង គឺជាដំណឹងល្អបំផុត ដែលគេបានថ្លែងប្រាប់ថា ព្រះគ្រីស្ទ ដ៏ជាព្រះសង្រ្គោះ ទ្រង់ប្រសូត្រហើយ!-DAVID MACCASLAND
សេចក្តីស្រឡាញ់របស់ព្រះ បានសម្តែងចេញ នៅបេថ្លេហិម។
ណាហ៊ុម ១:១៥
មើលន៍ នៅលើភ្នំទាំងឡាយ ឃើញជើងរបស់អ្នកដែលនាំដំណឹងល្អមក គឺជាអ្នកដែលប្រកាសប្រាប់ពីសេចក្តីសុខ។
ការអានបទគម្ពីរ សម្រាប់ថ្ងៃនេះ
ណាហ៊ុម ១:១-១៥
១ នេះជាសេចក្តីទំនាយយ៉ាងធ្ងន់ ពីដំណើរក្រុងនីនីវេ គឺជាសៀវភៅសំដែងចេញជាការជាក់ស្តែងរបស់ណាហ៊ុមជាអ្នកស្រុកអែលកូស។
២ ព្រះយេហូវ៉ាទ្រង់ជាព្រះប្រចណ្ឌ ទ្រង់ក៏សងសឹកដែរ ព្រះយេហូវ៉ាទ្រង់សងសឹក ហើយក៏មានពេញដោយសេចក្តីក្រោធ ព្រះយេហូវ៉ាទ្រង់សងសឹក ដល់ពួកអ្នកតតាំងនឹងទ្រង់ ហើយទ្រង់រក្សាទុកនូវសេចក្តីក្រោធ សំរាប់ពួកខ្មាំងសត្រូវ ៣ ព្រះយេហូវ៉ាទ្រង់យឺតនឹងខ្ញាល់ ហើយមានព្រះចេស្តាយ៉ាងធំ ទ្រង់មិនលះលែងទោសរបស់មនុស្សឡើយ ឯផ្លូវរបស់ព្រះយេហូវ៉ា នោះនៅក្នុងខ្យល់កួច ហើយក្នុងព្យុះសង្ឃរា ពពកទាំងឡាយជាធូលីហុយពីព្រះបាទទ្រង់ ៤ ទ្រង់ស្តីបន្ទោសដល់សមុទ្រ ក៏ធ្វើឲ្យគោកទៅ ទ្រង់ធ្វើឲ្យទន្លេទាំងប៉ុន្មានរីងស្ងួតដែរ ចំណែកឯស្រុកបាសាន ក៏រោយរៀវចុះ ព្រមទាំងស្រុកកើមែលផង ឯផ្ការបស់ព្រៃល្បាណូនក៏ស្រពោនដែរ។ ៥ ភ្នំធំទាំងឡាយកក្រើកនៅចំពោះទ្រង់ ហើយអស់ទាំងភ្នំតូចក៏រលាយទៅ ដ៏រំពើកចុះឡើងនៅចំពោះព្រះភក្ត្រទ្រង់ អើ ទាំងលោកីយ៍ និងទាំងអស់ដែលអាស្រ័យនៅក្នុងលោកដែរ ៦ តើមានអ្នកណាដែលអាចនឹងឈរនៅមុខសេចក្តីគ្នាន់ក្នាញ់របស់ទ្រង់បាន តើអ្នកណានឹងធន់នៅបាន ក្នុងពេលដែលសេចក្តីខ្ញាល់ដ៏សហ័សរបស់ទ្រង់ឆួលឡើង ឯសេចក្តីក្រោធរបស់ទ្រង់នោះក៏ចាក់ចេញដូចជាភ្លើង ហើយថ្មទាំងប៉ុន្មានក៏ត្រូវបែកសញ្ជែកដោយសារទ្រង់ ៧ ព្រះយេហូវ៉ាទ្រង់ល្អ ទ្រង់ជាទីពឹងមាំមួននៅគ្រាលំបាក ក៏ស្គាល់អស់អ្នកដែលយកទ្រង់ជាទីពឹងផ្អែក ៨ តែទ្រង់នឹងរំលីងទីកន្លែងរបស់ពួកតតាំងដោយទឹកជន់ហូរលិច ហើយនឹងដេញពួកខ្មាំងសត្រូវទ្រង់ទៅក្នុងទីងងឹត។។
៩ ឯងរាល់គ្នាគិតបង្កើតអ្វី ទាស់នឹងព្រះយេហូវ៉ានោះ ឯទ្រង់ នឹងធ្វើឲ្យផុតទៅអស់រលីង សេចក្តីទុក្ខវេទនានឹងមិនកើតឡើងដល់ទៅ២ដងទេ ១០ ដ្បិតគេនឹងត្រូវឆេះអស់រលីងទៅ ដូចជាជញ្ជ្រាំងស្ងួត ដោយគេស្រេះប្រទាក់គ្នាដូចជាបន្លា ក៏ស្រវឹងដូចជាបានផឹកស្រាហើយ ១១ មានម្នាក់ចេញពីឯងមក ដែលគិតគូរការអាក្រក់ទាស់នឹងព្រះយេហូវ៉ា គឺជាអ្នកដែលប្រឹក្សាសុទ្ធតែអំពើអាក្រក់ ១២ ព្រះយេហូវ៉ា ទ្រង់មានព្រះបន្ទូលដូច្នេះថា ទោះបើគេមានពេញកំឡាំង ហើយមានគ្នាច្រើនផងក៏ដោយ គង់តែគេនឹងត្រូវកាត់ចុះ ហើយកន្លងបាត់ទៅ អញបានធ្វើទុក្ខឯងម្តងហើយ ដើម្បីមិនឲ្យត្រូវធ្វើទៀតឡើយ ១៣ ឥឡូវនេះ អញនឹងបំបាក់នឹមរបស់គេចេញពីឯង ហើយបណ្តាច់ចំណងឯងផង។
១៤ ព្រះយេហូវ៉ាទ្រង់បានបង្គាប់ពីដំណើរឯងថា ឯងនឹងមិនមានពូជបន្តឈ្មោះទៀតឡើយ អញនឹងកាត់អស់ទាំងរូបឆ្លាក់ និងរូបសិតពីវិហាររបស់ព្រះទាំងប៉ុន្មាននៃឯងចេញ ហើយនឹងរៀបចំផ្នូរឯង ដ្បិតឯងគំរក់ណាស់។
១៥ មើលន៍ នៅលើភ្នំទាំងឡាយ ឃើញជើងរបស់អ្នកដែលនាំដំណឹងល្អមក គឺជាអ្នកដែលប្រកាសប្រាប់ពីសេចក្តីសុខ ឱយូដាអើយ ចូររក្សាថ្ងៃបុណ្យទាំងប៉ុន្មានរបស់ឯង ចូរលាបំណន់ឯងចុះ ដ្បិតមនុស្សអាក្រក់នឹងមិនដែលដើរកាត់ឯងទៀតឡើយ គេត្រូវកាត់ចេញអស់រលីងហើយ។
លោកអ្នកអាចវិលត្រឡប់ទៅកាន់ទំព័រដើមរបស់គេហទំព័រ អំណោយនៃព្រះគុណរបស់ព្រះ ដើម្បីមើលអត្ថបទ និងធនធានដទៃទៀត