ជារៀងរាល់ឆ្នាំ ពេលដែលបុណ្យណូអែលមកដល់ តាមធម្មតា ប្រទេសសឹង្ហបុរីកំពុងស្ថិតនៅក្នុងរដូវភ្លៀងដ៏ជោគជាំ មិនមានព្រឹលធ្លាក់ដូចនៅអឺរ៉ុបទេ គឺមានតែទឹកភ្លៀង។ ដោយសារខ្ញុំចម្រើនវ័យធំឡើង ក្នុងគ្រួសារដែលមិនមែនជាគ្រីស្ទបរិស័ទ នោះយើងមិនបានប្រារព្ធពិធីបុណ្យណូអែលទេ។ ប៉ុន្តែ កាលនៅពីក្មេង ខ្ញុំ និងបងប្អូន ព្រមទាំងអ្នកជិតខាងពីរបីនាក់ទៀត បានសម្រេចចិត្តធ្វើការប្តូរកាដូ នៅថ្ងៃណូអែល។ ខ្ញុំមិនដឹងថា យើងបានគំនិតនេះ ពីណាមកទេ ប្រហែលយើងចេះប្តូរកាដូគ្នា តាមកម្មវិធីទូរទស្សន៍ដែលយើងបានមើលហើយ។ យើងបានសរសេរឈ្មោះយើង ដាក់ចូលក្នុងថង់ ហើយពេលយើងចាប់ចំឈ្មោះអ្នកណា យើងនឹងទិញកាដូឲ្យអ្នកនោះ។ ក្នុងចំណោមយើង មានអ្នកខ្លះសប្បាយចិត្តនឹងអំណោយដែលខ្លួនបានទទួល ខណៈពេលដែល អ្នកខ្លះមិនពេញចិត្តនឹងអំណោយ ប៉ុន្តែ យើងទាំងអស់គ្នាសុទ្ធតែសប្បាយចិត្ត ដែលបានទទួលអំណោយ។
កាលនោះ យើងមិនបានដឹងទេថា មានអំណោយមួយដែលល្អឥតខ្ចោះ ដែលព្រះអាទិករបានប្រទានមកយើងរាល់គ្នា កាលពីជាង២០០០ឆ្នាំមុន។ ព្រះគម្ពីរបានចែងថា “ដ្បិតព្រះទ្រង់ស្រឡាញ់មនុស្សលោកដល់ម្ល៉េះ បានជាទ្រង់ប្រទានព្រះរាជបុត្រាទ្រង់តែមួយ”(យ៉ូហាន ៣:១៦)។ កាលខ្ញុំនៅក្នុងវ័យក្មេងជំទង់ ខ្ញុំធ្លាប់បានឮអំពីអំណោយដ៏អស្ចារ្យនេះ ហើយក៏បានទទួលព្រះយេស៊ូវជាព្រះសង្រ្គោះរបស់ខ្ញុំ។
ខ្ញុំចាំថា ខ្ញុំបានប្រារព្ធពិធីបុណ្យណូអែលជាលើកទីមួយ ក្នុងនាមជាអ្នកជឿព្រះគ្រីស្ទ។ ខ្ញុំក៏បានដឹងថា បុណ្យណូអែលមានលក្ខណៈពិសេស ព្រោះទីបំផុតខ្ញុំក៏បានយល់ អំពីអត្ថន័យរបស់ពិធីបុណ្យមួយនេះ គឺដឹងថា ពិធីបុណ្យណូអែល ជាការអបអរអំណោយដ៏ឥតខ្ចោះរបស់ព្រះ ហើយអំណោយនោះគឺជាអង្គព្រះយេស៊ូវគ្រីស្ទ។ ខ្ញុំក៏បានដឹងថា ព្រះទ្រង់មិនមែនជាអំណាចអធិធម្មជាតិ ដ៏អាថ៌កំបាំងនោះឡើយ តែទ្រង់ជាព្រះដែលមានលក្ខណៈជាអង្គបុគ្គល ដែលស្រឡាញ់មនុស្សនៅគ្រប់ជាតិសាសន៍ និងគ្រប់ស្រទាប់វណ្ណៈ។ ហើយព្រះដែលជាអង្គបុគ្គលនេះ ទ្រង់បានបង្ហាញសេចក្តីស្រឡាញ់ចំពោះខ្ញុំ ដោយសុគតជំនួសខ្ញុំ ដើម្បីលោះខ្ញុំឲ្យរួចពីបាប។
ក្នុងអំឡុងពេលនៃបុណ្យណូអែលនេះ សូមយើងបន្តផ្តោតចិត្តទៅលើព្រះគ្រីស្ទនៃបុណ្យណូអែល។-POH FANG CHIA
នៅបេថ្លេហិម ព្រះទ្រង់បានសម្តែងចេញនូវសេចក្តីស្រឡាញ់ ដោយប្រទានព្រះរាជបុត្រាទ្រង់ជាអំណោយ។
ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១។-យ៉ូហាន ៣:១៦
ការអានបទគម្ពីរសម្រាប់ថ្ងៃនេះ
យ៉ូហាន ៣:១៦-២១
ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ ១៧ ពីព្រោះព្រះទ្រង់មិនបានចាត់ព្រះរាជបុត្រាទ្រង់ ឲ្យមកក្នុងលោកីយ៍ ដើម្បីនឹងជំនុំជំរះលោកីយ៍នោះទេ គឺឲ្យលោកីយ៍បានសង្គ្រោះ ដោយសារទ្រង់វិញ ១៨ ឯអ្នកណាដែលជឿដល់ទ្រង់ នោះមិនជាប់មានទោសទេ តែអ្នកណាដែលមិនជឿវិញ នោះត្រូវមានទោសហើយ ពីព្រោះមិនបានជឿដល់ព្រះនាមនៃព្រះរាជបុត្រាតែ១របស់ព្រះ ១៩ ហើយទោសនេះ គឺថា ពន្លឺបានមកក្នុងលោកីយ៍ តែមនុស្សលោកចូលចិត្តនឹងសេចក្តីងងឹតជាជាងពន្លឺ ពីព្រោះអំពើដែលគេធ្វើទាំងប៉ុន្មាន សុទ្ធតែអាក្រក់ ២០ ដ្បិតអ្នកណាដែលប្រព្រឹត្តអាក្រក់ នោះតែងស្អប់ដល់ពន្លឺ ហើយមិនមកឯពន្លឺទេ ក្រែងអំពើដែលខ្លួនប្រព្រឹត្តទាំងប៉ុន្មាន បានបើកឲ្យឃើញ ២១ តែអ្នកណាដែលប្រព្រឹត្តតាមសេចក្តីពិតវិញ នោះតែងមកឯពន្លឺ ដើម្បីឲ្យអំពើដែលខ្លួនប្រព្រឹត្ត បានសំដែងមកឲ្យដឹងថា បានធ្វើដោយនូវព្រះ។
លោកអ្នកអាចវិលត្រឡប់ទៅកាន់ទំព័រដើមរបស់គេហទំព័រ អំណោយនៃព្រះគុណរបស់ព្រះ ដើម្បីមើលអត្ថបទ និងធនធានដទៃទៀត