សូមអាន: សាស្ដា ៤:៩-១២
លោកស៊ីសេរ៉ូ (Cicero) ស្ថិតក្នុងចំណោមអ្នកប្រាជ្ញ ដ៏ល្បីល្បាញម្នាក់ នៅចក្រភពរ៉ូម៉ាំង។ គាត់ជា វាគ្មិនប្រកបដោយវោហារសាស្រ្ត មេធាវី អ្នកនយោបាយ ភាសាវិទូ និងជាអ្នកនិពន្ធ ដ៏ស្ទាត់ជំនាញ។ សព្វថ្ងៃនេះ គេនៅតែដកស្រង់ពាក្យសម្តីរបស់គាត់មកប្រើ ព្រោះសំណេររបស់គាត់មានភាពសាមញ្ញ និងច្បាស់លាស់ ហើយទស្សនវិជ្ជារបស់គាត់ទៀតសោត ក៏សមស្របសម្រាប់ការរស់នៅជាក់ស្តែង។
ឧទាហរណ៍ គាត់បានមានប្រសាសន៍ អំពីការរាប់អានមិត្តភក្ដិថា “មិត្តភាពបង្កើនសុភមង្គល និងកាត់បន្ថយទុក្ខព្រួយ តាមរយៈការបន្ថែមអំណរទ្វេរដង ហើយចែករំលែកទុក្ខព្រួយ”។ គាត់យល់ថា មិត្តភាពមានអត្ថប្រយោជន៍ទ្វេរដង នៅលើវិថីជីវិត។ នៅមុខសម័យរបស់លោកស៊ីសេរ៉ូ ប្រហែលជិត១ ពាន់ឆ្នាំ ស្ដេចសាឡូម៉ូនក៏បានសរសេរ អំពីតម្លៃរបស់មិត្តសំឡាញ់ផងដែរ។ គឺដូចដែលទ្រង់បានចែងក្នុងកណ្ឌគម្ពីរសាស្ដាថា “មានគ្នា២នាក់ នោះវិសេសជាងនៅតែឯង ពីព្រោះគេមានរង្វាន់យ៉ាងល្អកើតពីការនឿយហត់របស់ខ្លួន ដ្បិតបើដួល នោះម្នាក់នឹងជ្រោងគ្នាឡើងវិញ តែវរហើយ អ្នកណាដែលដួលក្នុងកាលដែលនៅតែម្នាក់ឯង ឥតមានគ្នានឹងជួយជ្រោងឡើងវិញ” (៤:៩-១០)។ ជាការពិតណាស់ ជីវិតដែលគ្មានមិត្តសំឡាញ់ ធ្វើឲ្យការធ្វើដំណើរមានភាពឯកោ និងពិបាកទ្រាំទ្រ។
ទាំងអ្នកប្រាជ្ញជនជាតិរ៉ូមាំង និងស្តេច ដែលជាអ្នកប្រាជ្ញជនជាតិយូដានោះ សុទ្ធតែនិយាយត្រូវណាស់។ មិត្តសំឡាញ់ គឺសំខាន់។ មិត្តសំឡាញ់អាចធ្វើជាអ្នក ដែលយើងអាចទុកចិត្ត និងជាអ្នកប្រឹក្សាយោបល ហើយថែមទាំងជួយរំលែកទុក្ខព្រួយផង។ សូមគិតអំពីមិត្តសំឡាញ់របស់អ្នកចុះ។ តើអ្នកធ្លាប់បានព្រងើយកន្តើយ នឹងមនុស្សដែលព្រះទ្រង់បានប្រទានមក ដើម្បីជួយរំលែកក្តីអំណរ និងទុក្ខព្រួយរបស់អ្នកឬទេ? បើសិនជាដូច្នោះមែន សូមស្វែងរកមិត្តភក្តិណាម្នាក់ ដើម្បីធ្វើការប្រកបគ្នា នៅសប្ដាហ៍នេះចុះ។ សូមចាំថា “មានគ្នាពីរនាក់ នោះវិសេសជាង នៅតែម្នាក់ឯង” ព្រោះមិត្តសំឡាញ់នឹងបង្កើនអំណរទ្វេដង និងជួយរំលែកទុក្ខព្រួយផងដែរ។ – HDF
តើអ្នកចង់អរព្រះគុណដល់ព្រះជាម្ចាស់ សម្រាប់នរណាខ្លះ ដែលទ្រង់បានប្រទានមក ឲ្យរួមដំណើរ និងរួមសុខទុក្ខជាមួយអ្នក នៅក្នុងជីវិតនេះ? សូមធ្វើអ្វីមួយ ដើម្បីបង្ហាញការសរសើរ និងឲ្យតម្លៃចំពោះពួកគេ នៅថ្ងៃនេះ។