ថ្ងៃទី៧
អាន យ៉ាកុប ២:១៨-២៦
មានពេលមួយមិត្តភក្តិខ្ញុំម្នាក់បានលាន់មាត់ថា “ខ្ញុំមិននឹកស្មានថា ពួកគេបានធ្វើអញ្ចឹងដាក់អ្នកសោះ។ ពួកគេជាគ្រីស្ទបរិស័ទ ពួកគេគួរតែដឹងច្បាស់ នេះមិនមែនជាទង្វើរត្រឹមត្រូវទេ។
ខ្ញុំបានឮគេនិយាយជាញឹកញាប់ថា ថាគ្រីស្ទបរិស័ទធ្វើឲ្យពួកគេឈឺចាប់ ធ្វើឲ្យពួកគេធ្លាក់ចុះ ឬនិយាយនូវពាក្យអាក្រក់ៗដាក់ពួកគេ។ អ្នកប្រហែលជាធ្លាប់ឮរឿងនេះ ហើយក៏ប្រហែលជាធ្លាប់មានបទពិសោធន៍ខ្លួនឯងផងដែរ។
លោកិយមានពេញទៅដោយមនុស្សដែលមិនទាន់ជឿព្រះ ដូចនេះ គេមានការរំពឹងគិតដ៏ខ្ពស់ថា ថា គ្រីស្ទបរិស័ទគួររស់នៅ ដោយខ្នាតគំរូដែលខ្ពស់ជាងនេះ ។ ពួកគេគិតថា គ្រីស្ទបរិស័ទរស់នៅស្របតាមសេចក្តីជំនឿរបស់ខ្លួន។ ហើយនោះមិនមែនជាការទាមទារមិនសមហេតុផលនោះទេ ព្រោះសាវ័កយ៉ាកុបក៏បានប្រាប់យើងផងដែរ ជំនឿយើងត្រូវមានការប្រព្រឹត្ត ដើម្បីឲ្យលោកិយដឹងថា យើងមានសេចក្តីជំនឿដែលនាំឲ្យការផ្លាស់ប្តូរជីវិត។
យើងប្រកាសថា ព្រះយេស៊ូវគឺជាព្រះអម្ចាស់ នោះយើងត្រូវតែបង្ហាញឲ្យគេដឹងថា ព្រះអង្គពិតជាព្រះអម្ចាស់មែន តាមរយៈការប្រព្រឹត្តដោយស្តាប់បង្គាប់ព្រះអង្គ ឬបង្កើត“ផលផ្លែល្អ” (ម៉ាថាយ ៧:១៦-២១)។ កណ្ឌគម្ពីរ យ៉ាកុប ២:១៨-២៦ បានចែងថា ជំនឿដែលគ្មានការប្រព្រឹត្ត គឺជាជំនឿ “ស្លាប់” ឬ “គ្មានប្រយោជន៍”។ ត្រង់ចំណុចនេះ គឺមានន័យថា យើងអាចអះអាងថា យើងមានជំនឿដែលនាំឲ្យបានសង្គ្រោះ តែតាមពិត យើងមិនមានជំនឿទាល់តែសោះ។ បើគ្រាន់តែចេះសូត្រព្រះបន្ទូលព្រះ តែមិនប្រព្រឹត្តតាមទេ គឺគ្មានប្រយោជន៍នោះទេ។ លោកយ៉ាកុបប្រាប់យើងថា សូម្បីតែពួកអារក្សក៏ជឿថាព្រះមានពិតមែនផងដែរ។
តើធ្វើដូចម្តេចឲ្យយើងអាចដឹងថា យើងមានជំនឿពិតប្រាកដ?
ជំនឿពិត គឺមិនគ្រាន់តែជាការទទួលស្គាល់សេចក្តីពិតក្នុងចិត្ត និងពាក្យសម្តីប៉ុណ្ណោះឡើយ ពោលគឺត្រូវមានការប្រព្រឹត្តជាសម្អាងផងដែរ។ ។
កណ្ឌគម្ពីរយ៉ាកុបក៏បាននិយាយអំពីភាពមិនអាចកាត់ផ្តាច់ចេញពីគ្នា នៃជំនឿ និងការប្រព្រឹត្ត គឺដូចដែលលោកអ័ប្រាហាំ និងនាងរ៉ាហាប បានធ្វើជាគំរូ ក្នុងជីវិតរបស់ពួកគេស្រាប់។ ការប្រព្រឹត្តរបស់ពួកគេ បានបង្ហាញថា ជំនឿរបស់ពួកគេ មានការប្រព្រឹត្តតាមដ៏ល្អប្រសើរ។
សរុបមក ជំនឿបង្កើតផលផ្លែល្អ។ គឺដូចដែលព្រះយេស៊ូវទ្រង់មានបន្ទូលក្នុងម៉ាថាយ ៧:១៧-១៨ថា “អស់ទាំងដើមឈើល្អ តែងមានផ្លែល្អ ឯដើមឈើអាក្រក់ ក៏តែងមានផ្លែអាក្រក់ដែរ ធម្មតាដើមឈើល្អ មិនដែលបញ្ចេញផលអាក្រក់បានទេ ហើយដើមដែលអាក្រក់ ក៏ពុំអាចបញ្ចេញផលល្អបានដែរ”។
បងប្អូនអើយ កាលណាខ្ញុំដើរតាមព្រះយេស៊ូវកាន់តែជិតស្និទ្ធ នោះខ្ញុំក៏កាន់តែដឹងថាទ្រង់អស្ចារ្យប៉ុណ្ណា។ គឺដឹងថា ទ្រង់បានប្រទានជីវិត និងសេរីភាពយ៉ាងដូចម្តេចខ្លះ។ បើខ្ញុំចង់ឲ្យមិត្តភក្តិដើរតាមព្រះយេស៊ូវដែរ ខ្ញុំត្រូវ “បង្ហាញ”ឲ្យពួកគេស្គាល់ព្រះយេស៊ូវ តាមរយៈការប្រព្រឹត្តរបស់ខ្ញុំ។ របៀបដែលខ្ញុំរស់ក្នុងជីវិតរបស់ខ្ញុំ នឹងបន្លឺសម្លេងបានឮជាង និងច្បាស់ជាង ពាក្យសម្តីដែលខ្ញុំនិយាយទៅទៀត។ យើងគឺជាទូតរបស់ព្រះគ្រីស្ទ។ ដូច្នេះ ចូរឲ្យជីវិតរបស់យើង ក្លាយជាការសម្តែងចេញនូវសេរីភាព និងសេចក្តីស្រឡាញ់ដែលអាចរកឃើញ តែនៅក្នុងទំនាក់ទំនងជាមួយទ្រង់ប៉ុណ្ណោះ។
ដោយ Rachel Moreland សហរដ្ឋអាមេរិក
សំណួរត្រិះរិះ
១. តើអ្នកអាចធ្វើអ្វីបាន នៅសប្ដាហ៍នេះ ដើម្បីបង្ហាញពីសេចក្ដីជំនឿរបស់អ្នក និងសេចក្តីស្រឡាញ់របស់ព្រះយេស៊ូវ?
២. តើមានជំហានអ្វីខ្លះ ដែលអ្នកអាចពង្រឹងជំនឿរបស់អ្នកផ្ទាល់ ឧទាហរណ៍ ចំណាយពេលបន្ថែមសម្រាប់ការអានព្រះគម្ពីរ អធិស្ឋានឲ្យបានទៀតទាត់ ចែកចាយដំណឹងល្អជាមួយមនុស្ស ដែលមិនទាន់ជឿព្រះ។