តើជីវិតអ្នកបានសង់នៅលើថ្មដា ឬនៅលើដីខ្សាច់? នេះជាសំណួរ ដែលតម្រូវឲ្យយើងជីកឲ្យជ្រៅ ចូលទៅក្នុងគ្រឹះរបស់យើង ប៉ុន្តែ វានឹងមានឥទ្ធិពលដ៏អស្ចារ្យមកលើរបៀបដែលយើងជម្នះខ្យល់ព្យុះនៃជីវិត។ បទគម្ពីរម៉ាថាយ ៧:២៤–២៩ បានចែងថា អ្នកដែលសង់ជីវិតខ្លួន នៅលើថ្មដា គឺជាមនុស្សមានប្រាជ្ញា។ គឺជាជីវិតដែលដែលពឹងផ្អែកទៅលើព្រះតែប៉ុណ្ណោះ ហើយបានសង់ឡើង ដោយស្តាប់បង្គាប់តាមព្រះបន្ទូលព្រះអង្គ។ ជីវិតដែលសង់នៅលើដីខ្សាច់ គឺជាជីវិតដែលស្វែងរកក្តីសុខ នៅក្នុងទ្រព្យសម្បត្តិមិនស្ថិតស្ថេរ ការប្រឹក្សាយោបល ដែលមិនបានគិតវែងឆ្ងាយ និង “សេចក្តីពិត” ដែលពុកផុយ ដែលសុទ្ធតែមានការប្រែប្រួល ទៅតាមកាលៈទេសៈ និងពេលវេលា។
ការសាងសង់ជីវិតយើង នៅលើថ្មដា គឺគ្មាន “ផ្លូវកាត់” ទេ។ យើងត្រូវឆ្លងកាត់ការលត់ដំ និងរៀនទុកចិត្តព្រះ ហើយជាលទ្ធផល យើងនឹងទទួលបានរង្វាន់ ដែលជា “ផ្ទះ” ដែលមានព្រះយេស៊ូវ ជាគ្រឹះដ៏រឹងមាំ(១កូរិនថូស ៣:១១) គឺផ្ទះដែលមិនបាក់ស្រុត និងរង្គោះរង្គើរ ដោយសារបញ្ហាប្រឈមក្នុងជីវិតនេះឡើយ។
តើអ្នកយល់ថា ជីវិតដែលសង់នៅលើថ្មដា មានលក្ខណៈដូចម្តេចខ្លះ? តើជីវិតដែលសង់នៅលើថ្មដា ធ្វើឲ្យអ្នកកាន់តែមានភាពងាយស្រួល នៅក្នុងការឆ្លងកាត់ទុក្ខលំបាក និងភាពអយុត្តិធម៌ក្នុងជីវិតឬទេ?តើអ្នកនឹងស្តាប់បង្គាប់ព្រះយ៉ាងដូចម្តេច ពេលដែលព្រះអង្គត្រាស់ហៅអ្នក ឲ្យធ្វើការអ្វី ដែលហាក់ដូចជាមិនអាចធ្វើបាន?