តើអ្នកត្រូវធ្វើដូចម្តេច បើអ្នកមិនទាន់មានគូ (ជាពិសេស នៅថ្ងៃនៃសេចក្តីស្រឡាញ់)
តើពីមុនមក អ្នកធ្លាប់ស្រមៃថា អ្នកនឹងមានមង្គលការ ដ៏ល្អឥតខ្ចោះដែឬទេ? ខ្ញុំធ្លាប់មានក្តីស្រមៃដូចនេះ ជាពិសេស ក្នុងអំឡុងពេលបុណ្យចូលឆ្នាំចិន និងនៅថ្ងៃនៃសេចក្តីស្រឡាញ់។ ជួនកាល ពេលដែលខ្ញុំកំពុងទស្សនាខ្សែភាពយន្តស្នេហា ខ្ញុំក៏ចាប់ផ្តើមមានការស្រមៃផងដែរ។
តែការស្រមៃ នៅតែជាការស្រមៃដដែល។ ខ្ញុំធ្លាប់បានទទួលសំបុត្រស្នេហាខ្លះៗដែរ កាលពីមុន តែខ្ញុំមិនដែលមានការណាត់ជួបជាមួយនរណាម្នាក់ទេ។ ហើយខ្ញុំប្រហែលជាបាត់បង់ឱកាសខ្លះផងដែរ។
តែ រឿងអ្វីក៏អាចកើតឡើងដែរ។ យើងមិនដឹងថា ថ្ងៃស្អែកនឹងមានរឿងអ្វីកើតឡើងទេ មែនទេ? អ្នកប្រហែលជានិយាយថា ការនិយាយដូចនេះ គឺពិតជាគំនិតវិជ្ជមានណាស់។ តើអ្នកមានមិត្តភក្តិ ឬបងប្អូន ដែលបានរៀបការមុនអ្នក នៅក្នុងវ័យដ៏សមរម្យមួយមែនទេ? ជាការពិតណាស់ ខ្ញុំបានហួសវ័យនោះហើយ។ ព្រះគម្ពីរបានលើកយកឧទាហរណ៍ជាច្រើនមកនិយាយ អំពីជីវិតរបស់មនុស្សមួយចំនួន ដែលព្រះជាម្ចាស់ ប្រទានគូជីវិតដល់ពួកគេ នៅពេលដែលពួកគេមិនបាននឹកស្មានដល់។ ឧទាហរណ៍ : ពេលលោកអ៊ីសាក់កំពុងតែជញ្ជឹងគិតព្រះបន្ទូលព្រះ ជាប្រចំាថ្ងៃ នៅទីវាល គាត់ក៏បានក្រឡេកមើលទៅឃើញអនាគតភរិយារបស់គាត់(លោកុប្បត្តិ ២៤:៦៣)។ ចំណែកឯនាងរស់វិញ ពេលដែលនាងកំពុងតែរកកន្លែងធ្វើការ នាងក៏បានដើរចូលទៅក្នុងវាលស្រែរបស់លោកបូអូស(នាងរស់ ២:៣-១១) ហើយទីបំផុត គាត់ក៏បានទទួលយកនាងជាភរិយា។
ដូចនេះ ទោះខ្ញុំបានឈានចូលដល់វ័យ ដែលហាក់ដូចជាលែងចង់គិតពីរឿងនេះក្តី ខ្ញុំមិនអស់សង្ឃឹមឡើយ។ ថ្ងៃស្អែកអាចមានរឿង ដែលកើតឡើងខុសពីថ្ងៃនេះ។ រឿងអ្វីក៏អាចកើតឡើងដែរ។
ខណៈពេលដែលខ្ញុំកំពុងតែរង់ចាំថ្ងៃនោះមកដល់ មានការជាច្រើន ដែលព្រះជាម្ចាស់សព្វព្រះទ័យឲ្យខ្ញុំធ្វើ ហើយអ្នកក៏អាចអនុវត្តតាមចំណុចដែលមានដូចតទៅ:
១. ចូរបន្តបោះជំហានទៅមុខទៀត ក្នុងព្រះគុណព្រះ ខណៈពេលដែលទ្រង់កំពុងតែឲ្យវ័យរបស់អ្នករំកិលទៅមុខ។ ព្រះគម្ពីរសុភាសិតបានចែងអំពីទុក្ខលំបាករបស់អ្នកដែលរស់នៅជាមួយភរិយាដែលចូលចិត្តរករឿងឈ្លោះប្រកែក ហើយខ្ញុំជឿថា បទគម្ពីរនេះក៏និយាយ អំពីស្វាមីដែលពូកែឈ្លោះប្រកែកផងដែរ(សុភាសិត ២១:១៩, ២៥:២៤)។ តើអ្នកនឹងធ្វើឲ្យខ្លួនឯងមានតម្លៃលើស “ត្បូងទទឹម” សម្រាប់អនាគតភរិយា ឬអនាគតស្វាមីរបស់អ្នក(សុភាសិត ៣១:១០) ឬមួយអ្នកនឹងបានដូចជា “ទឹកភ្លៀងដែលលេចតាមដំបូងដែលធ្លុះ”(២៧:១៥)។ ដូចនេះ អ្នកចាំបាច់ត្រូវឆែកពិនិត្យមើលចរិយាសម្បត្តិរបស់អ្នក ឲ្យបានញឹកញាប់។ តើឆ្នាំនេះ អ្នកមានចិត្តដែលសណ្តោះប្រណី ឬពូកែរិះគន់ជាងឆ្នាំមុន?
២. ចូររស់នៅឲ្យមានសុខភាពល្អ។
បើអ្នកចង់មានសុភមង្គល ក្នុងជីវិតអាពាហ៍ពិពាហ៍ ឬក្នុងជីវិតនៅលីវក្តី អ្នកចាំបាច់ថែរក្សាសុខភាពឲ្យបានល្អ។ ដូចនេះ សូមបរិភោគអាហារឲ្យបានត្រឹមត្រូវ ហើយហាត់ប្រាណឲ្យបានទៀងទាត់។ មានជម្ងឺរាំរ៉ៃជាច្រើន ដែលមានដូចជាជម្ងឺទឹកនោមផ្អែមជាដើម បានកើតឡើងពីទម្លាប់អាក្រក់នៃការទទួលទៀនអាហារ និងការខ្វះខាតការហាត់ប្រាណ។ បើអ្នកចង់បង្កើតគ្រួសារនៅពេលអនាគត អ្នកប្រាកដជាចាំបាច់ត្រូវមានសុខភាពល្អ និងកម្លាំង ដើម្បីចិញ្ចឹម និងថែទាំប្តីប្រពន្ធ និងកូនរបស់អ្នក និងគ្រប់គ្រងគ្រួសារឲ្យបានល្អ។ អ្នកចាំបាច់ត្រូវរស់នៅ តាមរបៀបដែលនាំឲ្យមានសុខភាពល្អ ដើម្បីកុំឲ្យអ្នកក្លាយជាបន្ទុកសម្រាប់អនាគតភរិយា ឬស្វាមីរបស់អ្នក(ពេលដែលអ្នកបានរៀបការ) ឬសម្រាប់ក្រុមគ្រួសារ និងមិត្តភក្តិ(បើអ្នកបន្តនៅលីវ)។
៣. ចូររៀនទំនាក់ទំនងជាមួយមនុស្សគ្រប់វ័យ។
ជាញឹកញាប់ ខ្ញុំឮគេនិយាយថា ជីវិតអាពាហ៍ពិពាហ៍ មិនមែនសម្រាប់តែមនុស្សពីរនាក់នោះទេ ព្រោះអ្នកនឹងចូលទៅក្នុងគ្រួសាររបស់អនាគតស្វាមី ឬភរិយារបស់អ្នកផងដែរ។ ដូចនេះ អ្នកចាំបាច់ត្រូវរៀនទំនាក់ទំនងជាមួយក្មេងៗ មនុស្សជំទង់ និងមនុស្សចាស់។ ព្រះវិហារជាកន្លែងដែលបានផ្តល់ឱកាស ឲ្យអ្នករៀនទំនាក់ទំនងជាមួយអ្នកដទៃ។ ឧទាហរណ៍ អ្នកអាចយកអសារស្ត្រីដែលមានកូនតូច ដោយជួយមើលកូនឲ្យគាត់ពីរបីម៉ោង ឬចំណាយពេលចូលរួមក្នុងព័ន្ធកុមារ យុវជន ឬមនុស្សចាស់ជាដើម។ ព្រះគម្ពីរបានលើកទឹកចិត្តយើងថា “កាលណាយើងមានឱកាស នោះត្រូវធ្វើល្អដល់មនុស្សទាំងអស់ ហើយគឺដល់ពួកអ្នកជឿជាដើម”(កាឡាទី ៦:១០)។
៤. ចូររស់នៅជារៀងរាល់ថ្ងៃ ដោយមានគោលបំណងច្បាស់លាស់។
ចូរខិតខំធ្វើឲ្យបានល្អបំផុត នៅក្នុងការសិក្សា ឬការងាររបស់អ្នក។ ជួនកាល ខ្ញុំឆ្ងល់ថា តើជីវិតខ្ញុំនឹងទៅជាយ៉ាងណា បើសិនជាខ្ញុំបានរៀបការ។ តាមធម្មជាតិ និងអត្តចរិតរបស់ខ្ញុំ ខ្ញុំប្រហែលជានឹងក្លាយជាមេផ្ទះ ឬធ្វើការងារពាក់កណ្តាលពេល នៅពេលមានគ្រួសារ។ ប៉ុន្តែ សព្វថ្ងៃនេះ ដោយសារខ្ញុំនៅលីវ នោះខ្ញុំអាចធ្វើដំណើរទៅក្រៅប្រទេសនៅពេលណាក៏បាន តាមដែលការងារខ្ញុំបានតម្រូវ តែបើខ្ញុំមានគ្រួសារវិញ វានឹងមិនងាយស្រួលដូចនេះទេ។
៥. ចូររៀនស្គាល់មនុស្ស
បើមិត្តភក្តិរបស់អ្នកចង់ណែនាំអ្នក ឲ្យមានទំនាក់ទំនងជាមួយនរណាម្នាក់ អ្នកគួរតែរៀនរាប់អានគាត់ ជាមិត្តភក្តិសិន តាមរបៀបដ៏ត្រឹមត្រូវ។ ហើយការស្វែងរកគូរជីវិត តាមគេហទំព័រ ឬវេបសាយណាត់ជួបរបស់គ្រីស្ទបរិស័ទ ក៏មិនជាការខុសទាស់អ្វីដែរ ដែលសំខាន់នោះ អ្នកត្រូវរៀនប្រើប្រាជ្ញាដែលមកពីព្រះ។ អ្នកអាចឲ្យមិត្តភក្តិ និងក្រុមគ្រួសាររបស់អ្នក ជួយអ្នកក្នុងរឿងនេះ។ ចូរស្វែងរកយោបល់ល្អៗ យកការដាស់តឿនរបស់ពួកគេមកពិចារណា ហើយស្វាគមន៍ការជូនពរ ឬការរិះគន់របស់ពួកគេ។ ការនេះមិនមានន័យថា អ្នកត្រូវតែរៀបការជាមួយមនុស្ស ដែលអ្នកជួបនោះឡើយ។ អ្នកអាចចែកផ្លូវគ្នា ដោយសន្តិភាព បើសិនជាអ្វីៗមិនដំណើរការទៅមុខ។ ទន្ទឹមនឹងនោះ ចូរបន្តពង្រឹងទំនាក់ទំនងជាមួយមិត្តភក្តិ និងក្រុមគ្រួសារឲ្យបានរឹងមាំ។ ថ្ងៃណាមួយ អ្នកនឹងមិនអាចចំណាយពេលច្រើនជាមួយពួកគេទៀតទេ។
តើចំណុចដែលបានរៀបរាប់ខាងលើនេះ ហាក់ដូចជាច្រើនបន្តិចហើយមែនទេ។ តើអ្នកគ្រាន់តែបានរង់ចាំមនុស្សល្អដែលអ្នកចង់បានជាគូរអនាគត ឬក៏អ្នកកំពុងតែរៀបចំខ្លួនធ្វើជាមនុស្សល្អ សម្រាប់គូអនាគតរបស់អ្នកផងដែរ? ហើយទោះជាអ្នកនឹងទទួលលទ្ធផលយ៉ាងណាក៏ដោយ កាលបើអ្នកបានអនុវត្តតាមចំណុចខាងលើនេះ បានល្អហើយ អ្នកអាចនិយាយថា អ្នកបានរស់នៅ ក្នុងជីវិតដ៏អស្ចារ្យ ទោះអ្នកនឹងបន្តនៅលីវ ឬបានរៀបការក្តី!—Chia Poh Fang
This article was first published in ymi.today, the young adults arm of Our Daily Bread Ministries. Visit ymi.today to read more of such articles.
Looking to read more of the bible characters mentioned in this article? Check out Ruth and Hannah, as well as Mary and Martha.