ការសិក្សាព្រះគម្ពីរសម្រាប់ខ្លួនអ្នក
តើអ្នករីករាយនឹងការសិក្សាព្រះគម្ពីរដោយខ្លួនអ្នកទេ? តើអ្នកពេញចិត្តចំពោះសមត្ថភាពរបស់អ្នក ក្នុងការអនុវត្តន៍សេចក្តីពិតនៃព្រះគម្ពីរ ក្នុងជីវិតរស់នៅប្រចាំថ្ងៃដែរឬទេ? ពេលខ្លះ គ្រីស្ទបរិស័ទព្រងើយកន្តើយ ចំពោះការសិក្សាព្រះបន្ទូលព្រះ ដោយព្រោះតែពួកគេខ្វះវិធីដ៏សាមញ្ញ និងងាយអនុវត្ត ដែលធ្វើឲ្យការសិក្សាព្រះគម្ពីរមានភាពរស់រវើកចំពោះពួកគេ។ ទោះបីយើងជាកូនព្រះក៏ដោយ ក៏យើងមិនអាចចម្រើនលូតលាស់ និងមានភាពពេញវ័យខាងវិញ្ញាណបានទេ លុះត្រាតែយើងបរិភោគនំប៉័ងជីវិតបានទៀងទាត់។
មានអ្នកដឹកនាំគ្រីស្ទបរិស័ទម្នាក់បានថ្លែងថា “ខ្ញុំមិនអាចបញ្ជាក់បានច្រើនអំពីសារៈសំខាន់ និងតម្លៃនៃការសិក្សាព្រះគម្ពីរបានទេ . . . ព្រោះក្នុងសម័យកាលដែលមិនមានភាពច្បាស់លាស់នេះ គឺជាពេលដែលមនុស្សប្រុសស្រីមានទំនោរក្នុងការកំណត់នូវសំណួរផ្សេងៗ ចេញពីទស្សនៈងាយៗ ជាជាងផ្អែកលើគោលការណ៍ដ៏អស់កល្បជានិច្ច ដែលព្រះជាម្ចាស់បានដាក់ចេញមក”។
ការសិក្សាព្រះគម្ពីរ ចាប់ផ្តើមដោយ ការសង្កេត។ នៅពេលយើងសង្កេតមើលរបស់អ្វីមួយ រួមទាំងការសង្កេតព្រះគម្ពីរដែរ យើងត្រូវផ្ដោតលើលក្ខណៈនៃរបស់ ដែលត្រូវសិក្សានោះ។ យើងសិក្សាអំពីផ្កាយ តាមរយៈសម្លឹងមើលទៅវា ពីមួយយប់ទៅមួយយប់ ដោយប្រើកែវយឹត។ យើងសង្កេតមើលឥរិយារបស់សត្វ តាមរយៈការប្រើពេលមើលជាយូរ នៅឯទីកន្លែងរស់នៅ បែបធម្មជាតិរបស់ពួកវា។ យើងសង្កេតអំពីព្រះគម្ពីរ ដូចសង្កេតសៀវភៅផ្សេងដែរ គឺដោយអានដោយយកចិត្តទុកដាក់ និងឲ្យបានច្រើនដង។
បណ្ឌិត ចេមស៍ អែម គ្រេយ៍ (James M Gray) ដែលជាគ្រូបង្រៀនព្រះគម្ពីរ បានថ្លែងថា “មានច្បាប់តែមួយគត់ ក្នុងការសិក្សាព្រះគម្ពីរ ហើយច្បាប់នោះគឺ អានព្រះគម្ពីរ ហើយក្រោយពេលអ្នកអានហើយ គឺត្រូវអានទៀត បន្ទាប់មក អង្គុយចុះ ហើយអានទៀត បន្ទាប់មកទៀត អង្គុយចុះ ហើយអានម្តងទៀត ហើយការដែលអ្នកធ្វើដដែលៗនោះ អ្នកនឹងចេះព្រះគម្ពីរ”។
សូមអង្គុយអានកណ្ឌគម្ពីរ ដែលអ្នកកំពុងសិក្សា។ គម្ពីរដំណឹងល្អយ៉ូហាន និងកូរិនថូសទី២ គឺជាកណ្ឌគម្ពីរដ៏ល្អ ក្នុងការយកមកសិក្សាមុនគេ។ ត្រូវចាប់យកចំណុចគួរឲ្យចាប់អារម្មណ៍ច្បាស់លាស់មួយ របស់កណ្ឌគម្ពីរទាំងមូល។ កុំគិតអំពីការបែងចែកជំពូក និងខ។ ត្រូវអានម្តងហើយម្តងទៀត ហើយឆ្លៀតប្រើគម្ពីរបកប្រែផ្សេងៗបន្ថែម ដើម្បីឲ្យអ្នកអាចយល់អំពីខ្លឹមសារកាន់តែច្បាស់។ សួរសំណួរសម្រាប់ការសង្កេត ដូចជា ជានរណា? ជាអ្វី? នៅទីណា? នៅកន្លែងណា? ហេតុអ្វី? យ៉ាងដូចម្តេច?
បន្ទាប់ពីការសង្កេតលើអត្ថបទរួចហើយ នោះគឺ ការកាត់ស្រាយ។ យើងត្រូវតែប្រយ័ត្ន កុំឲ្យការសន្មត់ជាមុនរបស់យើង ធ្វើឲ្យការកាត់ស្រាយមានការលម្អៀង។ ចូរអធិស្ឋានទូលសូមការបំភ្លឺ ពីព្រះវិញ្ញាណបរិសុទ្ធ ព្រោះបើងាកចេញពីការបើកសម្ដែងរបស់ទ្រង់ នោះយើងពិបាកនឹងរកឃើញនូវការយល់ដឹងដ៏ត្រឹមត្រូវ (១យ៉ូហាន ២:២០, ២៧)។
សូមពិនិត្យអំពីបរិបទ នៃបទគម្ពីរដែលអ្នកកំពុងកាត់ស្រាយ។ សូមប្រៀបធៀបអត្ថបទ ដែលមានរឿងរ៉ាវស្របគ្នា ហើយឯកសារយោងផ្សេងៗផងដែរ។
លោក ឆាលស៍ ស្ព័រហ្គិន (Charles Spurgeon) បានកត់សម្គាល់ថា “សព្វថ្ងៃនេះ យើងឮថា មនុស្សនាំគ្នាហែកប្រយោគដែលសាមញ្ញ ក្នុងបទគម្ពីរ ដែលមានការទាក់ទងគ្នា ហើយក៏ស្រែកថា “ខ្ញុំរកឃើញហើយ!” (Eureka!) “ខ្ញុំរកឃើញហើយ!” (Eureka!) ហាក់ដូចជាគេបានរកឃើញសេចក្តីពិតថ្មីមួយអ៊ីចឹង ប៉ុន្តែ គេមិនទាន់បានរកឃើញដុំពេជ្រដ៏ពិតប្រាកដនោះទេ ផ្ទុយទៅវិញ គេរកឃើញតែបំណែកកែវបែកតែប៉ុណ្ណោះ”។
សៀវភៅអត្ថាធិប្បាយព្រះគម្ពីរល្អបំផុត គឺព្រះគម្ពីរផ្ទាល់តែម្តង។ ក៏ប៉ុន្តែ ក្បួនណែនាំព្រះគម្ពីរ វចនានុក្រមព្រះគម្ពីរ និងសៀវភៅមគ្គទេសក៍ព្រះគម្ពីរ អាចជួយយើងឲ្យយល់កាន់តែច្បាស់ អំពីផ្ទៃរឿងនៃព្រះគម្ពីរ ទំនៀមទម្លាប់ និងប្រវត្តិសាស្រ្ត។ សូមប្រឹក្សាអំពីអ្វីដែលអ្នកត្រូវការ តែត្រូវប្រយ័ត្ន កុំចំណាយពេលវែកញែកអំពីព្រះគម្ពីរខ្លាំងពេក ដោយគ្មានការងាកបែរទៅរកព្រះបន្ទូលរបស់ព្រះ សម្រាប់ខ្លួនអ្នកផ្ទាល់។
ចុងក្រោយ ការសិក្សាព្រះបន្ទូលព្រះ ត្រូវតែនាំឲ្យមាន ការអនុវត្តន៍ សម្រាប់ជីវិតរស់នៅរបស់អ្នកផ្ទាល់។ អ្នកមិនទាន់រៀនចប់សព្វគ្រប់ទេ លុះត្រាតែសេចក្តីពិតដែលអ្នកបានសិក្សានោះ ផ្លាស់ប្តូរអាកប្បកិរិយារបស់អ្នក។ សូមភ្ជាប់ព្រះគម្ពីរ ទៅក្នុងគ្រប់ផ្នែកនៃជីវិតរបស់អ្នក ដូចជា ភាពខ្លាំង ភាពកំសោយ អត្តចរិត និងសកម្មភាពរបស់អ្នក។ តើព្រះបន្ទូលនេះចែងដូចម្ដេចអំពីអ្នក ក្នុងនាមអ្នកជាឪពុកម្តាយ ឬជាកូន ជាប្តី ឬជាប្រពន្ធ ជាមិត្តភក្ដិ ឬជាអ្នកជិតខាង ជាបុគ្គលិក ឬជានិយោជក?
លោកយ៉ាកុបប្រាប់យើងថា “ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្តាប់ប៉ុណ្ណោះ ហើយបញ្ឆោតខ្លួនវិញនោះឡើយ” (យ៉ាកុប ១:២២)។ ចូរស្តាប់បង្គាប់ព្រះបន្ទូល តាមរយៈការជញ្ជឹងគិតប្រកបដោយអធិស្ឋាន និងដោយមានបំណងចិត្តចង់យល់ដឹងកាន់តែច្បាស់ ព្រមទាំងយកព្រះបន្ទូលមកអនុវត្តផង។
ការសង្កេត និងការកាត់ស្រាយ ព្រមទាំងការអនុវត្តន៍ គឺជាជំហានដ៏សាមញ្ញទាំងបី ដែលជាកូនសោរ បើកទ្វារឲ្យមានការសិក្សាព្រះគម្ពីរដោយរីករាយ!
ការជញ្ជឹងគិត
- តើអ្នកមានវិធីសាស្រ្តដែលសាមញ្ញ និងងាយស្រួលដើម្បីអនុវត្ត ក្នុងការសិក្សាព្រះបន្ទូលព្រះដែរឬទេ? តើអ្នកប្រើវិធីសាស្រ្តអ្វីដែរ? តើវិធីសាស្រ្តនោះអាចជួយអ្នក ឲ្យអនុត្តព្រះបន្ទូលព្រះសម្រាប់ជីវិតអ្នកបានដែរឬទេ?
ការអនុវត្តន៍
- កុំគ្រាន់តែអានព្រះគម្ពីរ។ បន្ទាប់ពីអ្នកអានព្រះគម្ពីរចប់ ចូរពិចារណាព្រះបន្ទូលព្រះ ហើយត្រិះរិះយ៉ាងល្អិតល្អន់ ឲ្យបានពីរបីនាទី។ ចូរសួរ និងពិនិត្យ ដូចតទៅៈ តើបទគម្ពីរនេះបង្រៀនអំពីអ្វី? តើមានន័យយ៉ាងណា? តើខ្ញុំត្រូវអនុវត្តបទគម្ពីរនេះយ៉ាងដូចម្តេច?
ដើម្បីត្រឡប់ទៅទំព័រដើមវិញ សូចចុចពីលើ link: https://khmer-odb.org/healthy-habits/