សេចក្តីអធិស្ឋានដែលស្របនិងព្រះហឫទ័យព្រះ
តើព្រះបន្ទូលសន្យាណាខ្លះ ដែលអ្នកចូលចិត្តជាងគេ? តើជាសេចក្តីសន្យា អំពីកំលាំង? អំពីសេចក្តីក្លាហាន? ឬអំពីសុវត្ថិភាព?
ខ្ញុំសូមចែកចាយនូវព្រះបន្ទូលសន្យាមួយ ដែលខ្ញុំពេញចិត្ត ដែលបានចែងថា: យើងក៏មានសេចក្តីក្លាហាន ដល់ទ្រង់យ៉ាងដូច្នេះដែរ គឺថា បើយើងនឹងសូមអ្វី ដែលត្រូវតាមព្រះហឫទ័យទ្រង់ នោះទ្រង់នឹងទទួលព្រម បើយើងដឹងថា ទ្រង់ទទួលព្រមតាមយើង ក្នុងការអ្វីដែលយើងសូមដូច្នេះ នោះយើងក៏ដឹងថា យើងបានអ្វីដែលយើងសូមពីទ្រង់ហើយដែរ ” (១យ៉ូហាន៥:១៤-១៥)។
សូមពិចារណាអំពីបទគម្ពីរនេះចុះ! ព្រះទ្រង់បានឲ្យគេកត់ទុកព្រះបន្ទូលទ្រង់ ដែលបានចែងថា អ្វីក៏ដោយដែលយើងទូលសូម ត្រូវតាមព្រះហឫទ័យទ្រង់ ទ្រង់និងប្រទានដល់យើង!
អ្នកប្រហែលជានិយាយថា: “ល្វីស (Luis) នៅមានបញ្ហាមួយទៀត”។ “ខ្ញុំមិនស្គាល់ព្រះហឫទ័យព្រះទេ។ តើសេចក្តីសន្យានេះល្អយ៉ាងម៉េចកើត បើខ្ញុំបានត្រឹមតែអាចស្មានអំពីព្រះហឫទ័យទ្រង់នោះ?”
សូមអរព្រះគុណព្រះអង្គ ព្រោះទ្រង់បានសំដែងចេញព្រះហឫទ័យទ្រង់ជាច្រើន នៅក្នុងព្រះគម្ពីរ។ តាមរយៈការយល់ដឹងអំពីព្រះបន្ទូលព្រះកាន់តែច្បាស់ អ្នកនឹងរៀនបានច្រើន អំពីព្រះហឫទ័យ ដែលទ្រង់មាន សម្រាប់ជីវិតអ្នក។ ទ្រង់មិនបានលាក់ព្រះហឫទ័យទ្រង់នោះទេ តែទ្រង់បានសំដែងចេញព្រះទ័យទ្រង់ ឲ្យមនុស្សបានស្គាល់ និងកត់ត្រាទុក! ចូរយើងកុំប៉ាន់ស្មានព្រះហឫទ័យគ្រប់គ្រងរបស់ទ្រង់ សម្រាប់ថ្ងៃស្អែកឡើយ ផ្ទុយទៅវិញ យើងគួរតែផ្តោតលើការស្តាប់បង្គាប់តាមព្រះហឫទ័យ ដែលទ្រង់បានសម្តែងឡើង សម្រាប់ថ្ងៃនេះវិញ។ បទគម្ពីរ ១យ៉ូហាន ៥:១៤-១៥ សន្យាថា ព្រះទ្រង់នឹងប្រទាននូវអ្វី ដែលយើងទូលសូម ដើម្បីយើងអាចធ្វើតាមព្រះហឫទ័យទ្រង់។ ការនេះរួមបញ្ចូលទាំងប្រាជ្ញា (យ៉ាកុប ១:៥) និងកម្លាំងមកពីទ្រង់(អេសាយ ៤០:២៩-៣១)។
បើអ្នកមិនប្រាកដថា ការទូលសូមរបស់អ្នក ស្របនឹងបំណងព្រះហឫទ័យទ្រង់ឬអត់ នោះចូរទូលសួរទ្រង់ ដ្បិតទ្រង់អាចមានបន្ទូលប្រាប់អ្នក។ កុំបារម្ភខ្លាចនិយាយខុស នៅក្នុងការអធិស្ឋាននោះឡើយ។ តើអ្នកគិតថាអំណាចគ្រប់គ្រងរបស់ព្រះ នឹងត្រូវរលាយបាត់ ដោយព្រោះតែកូនរបស់ទ្រង់តែម្នាក់ មានកំហុសនៅពេលអធិស្ឋានឬ? តើការដែលមិនអធិស្ឋានទាល់តែសោះ នោះមិនមែនជាកំហុសដ៏ធំទេឬអី?
ប្រសិនបើព្រះទ្រង់ឆ្លើយតបថា “ទេ” ចំពោះសេចក្តីសំណូមរបស់អ្នក នោះព្រះអម្ចាស់ទ្រង់ នឹងឆ្លើយបញ្ជាក់ តាមរយៈការធ្វើបន្ទាល់នៃព្រះវិញ្ញាណបរិសុទ្ធ នៅក្នុងចិត្តអ្នកមិនខាន។ បើអ្នកដើរជាមួយព្រះអម្ចាស់ ហើយជីវិតអ្នកមានការអធិស្ឋានខ្ជាប់ខ្ជួន នោះអ្នកនឹងងាយស្រួលទទួលការប៉ះពាល់ចិត្តពីព្រះវរបិតា និងងាយឆ្លើយតបចំពោះទ្រង់វិញផងដែរ។
ប្រសិនបើព្រះអង្គមានបន្ទូលមកកាន់អ្នក ដោយស្រទន់ថា “ទេ” ចំពោះអ្វីដែលអ្នកទូលសូម នោះទ្រង់ប្រាកដជាមានអ្វីដែលប្រសើរជាងនេះ បំរុងទុកសម្រាប់អ្នកហើយ។ ព្រះយេស៊ូវមានបន្ទូលថា: “ចុះបើអ្នករាល់គ្នាដែលអាក្រក់ អ្នកចេះឲ្យរបស់ល្អដល់កូនខ្លួនដូច្នេះ នោះចំណងបើព្រះវរបិតានៃអ្នកដែលទ្រង់គង់នៅស្ថានសួគ៌ ទ្រង់នឹងប្រទានរបស់ល្អ មកអស់អ្នកដែលសូម តើជាងអម្បាលម៉ានទៅទៀត!”(ម៉ាថាយ៧:១១)។ បើយើងទូលសូមដុំថ្មដែលគ្មានតម្លៃ នោះទ្រង់មានបន្ទូលថា “ទេ” ហើយផ្ទុយទៅវិញទ្រង់នឹងប្រទាននំប៉័ង ដ៏មានជីវជាតិដល់យើង។ ព្រះទ្រង់តែងតែប្រទានអ្វីដែលល្អដល់យើង។
យើងអាចចាប់ផ្តើមពិសោធនូវចិត្តឆេះឆួល ក្តីអំណរ និងការរំភើប ក្នុងជីរិតជាគ្រីស្ទបរិស័ទ ទាល់តែសេចក្តីសន្យារបស់ព្រះបានសម្រេចក្នុងជីវិតយើង តាមរយៈសេចក្តីអធិស្ឋាន។
ខាងក្រោមនេះ ខ្ញុំសូមបង្ហាញនូវព្រះបន្ទូលសន្យាជាច្រើន ដែលមានន័យយ៉ាងជ្រាលជ្រៅ សម្រាប់ជីវិតខ្ញុំ ជាពិសេស។ ខ្ញុំសូមលើកទឹកចិត្តអ្នក ឲ្យយកព្រះបន្ទូលសន្យាទាំងនោះ ទុកជាផ្នែកដ៏សំខាន់សម្រាប់ជីវិតអ្នក។
- “ចូរយកព្រះយេហូវ៉ាជាសេចក្តីអំណររបស់អ្នក នោះទ្រង់នឹងប្រទានឲ្យអ្នកបានដូចបំណងចិត្ត”(ទំនុកដំកើង ៣:៧៤)។
- “ព្រះយេហូវ៉ានឹងរក្សាអ្នក ឲ្យរួចពីគ្រប់ទាំងសេចក្តីអាក្រក់ ទ្រង់នឹងថែរក្សាព្រលឹងរបស់អ្នក ឯដំណើរដែលអ្នកចេញចូលទៅមក នោះព្រះយេហូវ៉ាទ្រង់នឹងរក្សា ចាប់តាំងពីឥឡូវនេះរៀងតទៅ”(ទំនុកដំកើង ១២១:៧-៨)។
- “ ព្រះនាមព្រះយេហូវ៉ា ជាប់ប៉មមាំមួន មនុស្សសុចរិតរត់ចូលទៅពឹងជ្រក ហើយមានសេចក្តីសុខ” (សុភាសិត១៨:១០)។
- “ បើអ្នករាល់គ្នានៅជាប់នឹងខ្ញុំ ហើយពាក្យខ្ញុំនៅជាប់ក្នុងអ្នករាល់គ្នា នោះចូរសូមអ្វីតាមតែប្រាថ្នាចុះ សេចក្តីនោះនឹងបានសម្រេចដល់អ្នករាល់គ្នាជាមិនខាន ” (យ៉ូហាន ១៥:៧)។
ការជញ្ជឹងគិត
- ក្នុងនាមជាកូនព្រះ តើព្រះមានបំណងព្រះហឫទ័យយ៉ាងណា ចំពោះអ្នក? តើអ្នកដឹងអំពីបំណងព្រះទ័យទ្រង់ ដោយរបៀបណា? តើអ្នកមានការប្តូរផ្តាច់យ៉ាងណា ក្នុងការធ្វើតាមព្រះហឫទ័យព្រះ?
ការអនុវត្តន៍
- តើអ្នកចូលចិត្តព្រះបន្ទូលសន្យាណាជាងគេ? សូមចំណាយពេលមួយនាទី ដើម្បីរំឭកព្រះបន្ទូលសន្យានោះ បន្ទាប់មកទទួលព្រះបន្ទូលសន្យានោះ ដោយផ្ទាល់ខ្លួន ហើយដាក់ជាសេចក្តីអធិស្ឋាន ទៅចំពោះព្រះបិតានៃស្ថានសួគ៌។
ដើម្បីត្រឡប់ទៅទំព័រដើមវិញ សូចចុចពីលើ link: https://khmer-odb.org/healthy-habits/