ការអធិស្ឋានដែលព្រះឆ្លើយតប
ព្រះអម្ចាស់បានប្រើលោក ឌីអិល មូឌី (D.L. Moody) ជាអ្នកផ្សាយដំណឹងល្អដ៏ល្បីល្បាញ ក្នុងសតវត្សរ៍ទី១៩ ដើម្បីជួយនាំមនុស្សនៅក្នុងពីរទ្វីប ឲ្យបានប្រែចិត្ត។ លោកបានធ្វើដំណើរប្រហែលជាជាងមួយលានគីឡូម៉ែត្រ ហើយបានអធិប្បាយ អំពីដំណឹងល្អរបស់ព្រះយេស៊ូវ ដែលធ្វើឲ្យជីវិតផ្លាស់ប្រែ ទៅកាន់មនុស្សជាងមួយរយលាននាក់!
តើលក្ខណៈពិសេសអ្វីខ្លះ ដែលធ្វើឲ្យលោកមូឌី អាចមានភាពលេចធ្លោ ក្នុងនាមជាមនុស្សរបស់ព្រះ ដែលបានឈោងចាប់មនុស្សជាច្រើន ក្នុងទ្វីបអឺរ៉ុប និងអាមេរិកខាងជើង? គាត់ជាមនុស្សដែលពេញ ដោយសេចក្តីជំនឿ។ គាត់ជាមនុស្សដែលមានចិត្តស្អាតស្អំ បរិសុទ្ធ។ ហើយគាត់ជាមនុស្សដែលពេញដោយការអធិស្ឋាន។ លោក មូឌី (Moody) បានទូលសូមឲ្យព្រះរើភ្នំដែលជាចិត្តមិនជឿព្រះ ពីក្នុងព្រលឹងរបស់បុរស និងស្ត្រី យុវជន និងកុមារ នៅតំបន់ទាំងនោះ ហើយព្រះទ្រង់ក៏ឆ្លើយតប!
លោក មូឌី (Moody) បានមានប្រសាសន៍ថា “សេចក្តីអធិស្ឋានរបស់អ្នកខ្លះ ត្រូវកាត់ឲ្យខ្លី ទាំងផ្នែកខាងដើម និងចុងបញ្ចប់ ហើយផ្នែកកណ្តាល ត្រូវមានការដុតបញ្ឆេះ”។
តើសេចក្តីអធិស្ឋានរបស់អ្នក មានការដុតបញ្ឆេះដែរឬទេ? តើសេចក្តីអធិស្ឋានទាំងនោះ ឮដល់ព្រះកាណ៍ទ្រង់ដែរឬទេ? តើសេចក្តីអធិស្ឋានទាំងនោះ អាចប៉ះពាល់ចិត្តមនុស្សឬទេ?
ខ្ញុំសូមចែកចាយដោយសង្ខេប អំពីសេចក្តីអធិស្ឋានបែបណា ដែលព្រះសព្វព្រះទ័យនឹងឆ្លើយតប។ ប្រសិនបើអ្នកចង់អនុវត្តតាមគោលការណ៍នេះ អស់ពីចិត្ត នោះសូមរង់ចាំមើល ព្រះទ្រង់បញ្ឆេះសេចក្តីអធិស្ឋានរបស់អ្នក!
ទីមួយ យើងត្រូវ ជឿ ។ តើអ្នកជឿថា ព្រះទ្រង់សព្វព្រះទ័យ ហើយអាចឆ្លើយតបសេចក្តីអធិស្ឋានរបស់អ្នកដែរឬទេ? នោះអ្នកនិយាយថា “ខ្ញុំជឿជាក់ទ្រង់ប្រាកដជាអាច”។ “ប៉ុន្តែខ្ញុំមិនដឹងច្បាស់ថា ទ្រង់សព្វព្រះទ័យឆ្លើយតបឬអត់ទេ”។ បទគម្ពីរហេព្រើរ ១១:៦ ចែងថា “តែបើឥតមានសេចក្តីជំនឿទេ នោះមិនអាចនឹងគាប់ ដល់ព្រះហឫទ័យព្រះបានឡើយ ដ្បិតអ្នកណាដែលចូលទៅឯព្រះ នោះត្រូវតែជឿថា មានព្រះមែន ហើយថា ទ្រង់ប្រទានរង្វាន់ ដល់អស់អ្នកដែលស្វែងរកទ្រង់”។
ការដែលមិនអធិស្ឋាន គឺជាបញ្ហា ប៉ុន្តែ បញ្ហាដែលធ្ងន់ធ្ងរជាងនេះទៀតនោះ គឺការមិនជឿ។ មានគ្រីស្ទបរិស័ទជាច្រើន ដែលមិនជឿថា ព្រះពិតជាអាចយល់ព្រម ចំពោះការទូលសូមរបស់ពួកគេទេ។ ជាការពិតណាស់ សេចក្តីអធិស្ឋានរបស់ពួកគេខ្វះភ្លើងបញ្ឆេះ! ព្រះគម្ពីរបង្រៀនយ៉ាងច្បាស់ថា ព្រះជាម្ចាស់ឆ្លើយតបសេចក្តីអធិស្ឋាន ដែលទូលថ្វាយដល់ទ្រង់ដោយចិត្តជឿ។
ទីពីរ យើងត្រូវតែ ទូលសូម ។ “អ្នករាល់គ្នាសង្វាតចង់បាន តែមិនបានទេ ពីព្រោះមិនសូម” (យ៉ាកុប៤:២)។ តើអ្នកចងចាំរឿង អំពីបុរសខ្វាក់ម្នាក់ នៅក្នុងបទគម្ពីរ ម៉ាកុស ជំពូក ១០ទេ? គាត់មានសេចក្តីរំភើបចិត្តខ្លាំងណាស់ នៅពេលបានជួបព្រះយេស៊ូវ។ ពេលនោះ ព្រះយេស៊ូវបានសួរគាត់ថា “តើចង់ឲ្យខ្ញុំធ្វើអ្វីឲ្យអ្នក?” ព្រះយេស៊ូវចង់ឲ្យពួកគេទូលសូមដល់ទ្រង់! ព្រះទ្រង់ សព្វព្រះទ័យបង្ហូរព្រះពរដល់យើង ដោយយើងគ្រាន់តែទូលសូមទ្រង់ប៉ុណ្ណោះ។
បុរសខ្វាក់បានទូលទ្រង់ដោយត្រង់ៗថា “លោកគ្រូអើយ សូមប្រោសភ្នែកទូលបង្គំឲ្យបានភ្លឺឡើង”។ គាត់មិនបានទូលសូមបញ្ឆិតបញ្ឆៀង ដូចដែលយើងធ្វើជាញឹកញាប់នោះទេ។ យើងព្យាយាមមួលពន្លាតព្រះហស្រ្តទ្រង់ ដោយសេចក្តី សំណូម និងការពន្យល់ ដ៏វែង ហើយលម្អិត។ អ្វីដែលយើងត្រូវធ្វើ គឺកាត់ពាក្យពេចន៍ដែលវែងអន្លាយចោល ហើយនិយាយឲ្យចំចំណុច។ នោះសេចក្តីអធិស្ឋានរបស់យើង នឹងបង្កើតជាអណ្តាតភ្លើងឡើង។
ទីបី យើងត្រូវ លន់តួបាប ។ អ្នកនិពន្ធទំនុកដំកើងបានសរសេរថា “បើសិនជាខ្ញុំឃើញមានសេចក្តីទុច្ចរិតនៅក្នុងចិត្ត នោះព្រះអម្ចាស់ទ្រង់មិនព្រមស្តាប់ខ្ញុំទេ”(ទំនុកដំកើង ៦៦:១៨)។ អំពើបាបពន្លត់អណ្តាតភ្លើងនៃសេចក្តីអធិស្ឋាន។ អំពើបាបដែលគ្មានការលន់តួ អាចពន្លត់សេចក្តីអធិស្ឋានលើស ពីការដែលយើងគិតទៅទៀត។
ស្តេចសូលបានថប់បារម្ភ នៅពេលទ្រង់បានដឹងខ្លួនថា តទៅនេះរហូតដល់អស់ជីវិត ព្រះទ្រង់នឹងមិនឆ្លើយតបចំពោះសេចក្តីអធិស្ឋានរបស់ទ្រង់ឡើយ(១សាំយូអែល២៨:៦)។ ទ្រង់បានអនុញ្ញាតឲ្យអំពើបាប ដែលមិនបានលន់តួ សាងសង់រនាំង កាត់ផ្តាច់ទ្រង់ ចេញពីព្រះអម្ចាស់។ តើមានអ្វីនៅកណ្តាលរវាងអ្នក និងព្រះទេ? បើមានមែន ចូរលន់តួអំពើបាបរបស់អ្នក ហើយពិសោធនូវការកែជាថ្មីរបស់ព្រះ ក្នុងជីវិតអ្នកឡើងវិញចុះ។
រៀងរាល់ពេល មុនចាប់ផ្តើមយុទ្ធនាការផ្សាយដំណឹងល្អ លោក មូឌី (Moody) តែងតែជំរុញចិត្តរាស្រ្តរបស់ព្រះ ឲ្យអធិស្ឋាន។ អណ្តាតភ្លើងនៃការផុសផល ដែលបានកើតមានឡើង នៅតាមទីក្រុងជាច្រើន គឺមិនមែនឆេះឡើង ដោយសារតែលោក មូឌី (Moody)ម្នាក់ឯងនោះទេ។ ភ្លើងទាំងនោះបានបញ្ឆេះឡើង តាមរយៈសេចក្តីអធិស្ឋានរបស់គ្រីស្ទបរិស័ទសាមញ្ញៗ ដែលជឿលើព្រះ ដែលបានលន់តួអំពើបាបរបស់ពួកគេ បន្ទាប់មកថ្វាយសេចក្តីអធិស្ឋាន ដែលព្រះសព្វព្រះទ័យឆ្លើយតប។
ការជញ្ជឹងគិត
- តើអ្នកយល់ថា វាជាការងាយស្រួល ឬលំបាកក្នុងការជឿថា ព្រះស្តាប់ឮ ហើយរីករាយនឹងឆ្លើយតបសេចក្តីអធិស្ឋានរបស់អ្នក? ហេតុអ្វីបានជាអ្នកគិតដូចនេះ?
ការអនុវត្តន៍
- តើអ្នកធ្លាប់ទទួលការឆ្លើយតប ចំពោះសេចក្តីអធិស្ឋានរបស់អ្នកទេ? តើអ្នកបានទូលសូមអ្វីពីព្រះ ហើយទ្រង់ឆ្លើយតបដោយរបៀបណា? សូមចំណាយពេលមួយ ឬពីរនាទី កត់ត្រាអំពីគ្រប់ទាំងការឆ្លើយតបដ៏ជាក់លាក់របស់ព្រះ ចំពោះសេចក្តីអធិស្ឋានរបស់អ្នក ដែលអ្នកអាចនៅចាំ។
ដើម្បីត្រឡប់ទៅទំព័រដើមវិញ សូចចុចពីលើ link: https://khmer-odb.org/healthy-habits/