ការទទួលយកអំណាចនៃព្រះគម្ពីរ
ការចោទសួរអំពីអំណាចនៃព្រះគម្ពីរ ស្ថិតក្នុងចំណោម ការចោទសួរដែលមានការជជែកវែកញែកច្រើនបំផុត និងមានប្រវត្តិយូរលង់ជាងគេ របស់មនុស្សជាតិ។ អំណាចនៃព្រះគម្ពីរ ក៏ស្ថិតនៅក្នុងចំណោមរឿងដ៏សំខាន់បំផុត ដែលយើងត្រូវពិចារណានៅថ្ងៃនេះ។ មនុស្សច្រើនតែបង្ហាញចេញនូវលក្ខណៈខាងវិញ្ញាណរបស់ខ្លួន តាមរយៈអត្តចរិតដែលពួកគេមាន ចំពោះព្រះគម្ពីរ។
ប៉ុន្មានឆ្នាំមុន ខ្ញុំមានឱកាសជួបជាមួយអ្នកបម្រើព្រះប្រហែល១២នាក់ នៅជិតទីក្រុងមួយ ដែលខ្ញុំបានចូលរួម ក្នុងការធ្វើយុទ្ធនាការផ្សាយដំណឹងល្អ។ បើខ្ញុំនិយាយថា ខ្ញុំមានការភ្ញាក់ផ្អើល ចំពោះការពិភាក្សារបស់ពួកយើង វាដូចជាលើសបន្តិច ប៉ុន្តែ ខ្ញុំពិតជាភ្ញាក់ផ្អើល ចំពោះការមានមតិយោបល់ធ្ងន់ៗខុសៗគ្នា ចំពោះសំណួរសំខាន់ៗមួយចំនួន។ យ៉ាងហោចណាស់ ពាក់កណ្តាលនៃអ្នកបម្រើព្រះទាំងនោះ គឺមិនបានទទួលស្គាល់ថា ព្រះគម្ពីរ ជាព្រះបន្ទូលដ៏មានអំណាចរបស់ព្រះឡើយ!
មនុស្សមួយចំនួនបាននិយាយថា ពួកគេជឿថា ក្នុងព្រះគម្ពីរបរិសុទ្ធ មានបទគម្ពីរខ្លះនិយាយខុស មិនត្រូវតាមវិទ្យាសាស្រ្ត ឬប្រវត្តិសាស្រ្ត។ អ្វីដែលកាន់តែភ្ញាក់ផ្អើលទៀតនោះ គឺពួកគេនិយាយដោយបើកចំហរថា នៅពេលដែលពួកគេមានអារម្មណ៍ទើសទាល់ ចំពោះបទគម្ពីរណាមួយ ពួកគេក៏លើកហេតុផល ដើម្បីបង្ហាញថា បទគម្ពីរនោះ “មិនស្របតាមវិទ្យាសាស្ត្រ”។
តើវាជារឿងចម្លែកទេ ដែលក្រុមគ្រីស្ទបរិស័ទ នៅកន្លែងខ្លះក្នុងពិភពលោកនេះ មានជំហរមិនរឹងមាំនោះ? តើមានអ្នកណាដែលចង់ស្តាប់គ្រូអធិប្បាយ ដែលមិនជឿថា ព្រះគម្ពីរគឺជាព្រះបន្ទូលរបស់ព្រះនោះ? តើអំណាចរបស់ពួកគេមកពីណា? តើធ្វើដូចម្តេចឲ្យអ្នកអាចដឹងច្បាស់ថា ព្រះជាអ្នកបណ្តាលឲ្យគេតែព្រះគម្ពីរប៊ីប ហើយព្រះគម្ពីរណាដែលព្រះមិនបណ្តាលឲ្យតែង?
នៅពេលដែលខ្ញុំឮអ្នកដែលអះអាងថា ខ្លួនជាគ្រីស្ទបរិស័ទ តែបែរជាសួរសំណួរថា តើព្រះគម្ពីរគឺជាព្រះបន្ទូលព្រះឬអត់ ខ្ញុំក៏ឆ្ងល់ភ្លាមថា តើគ្រីស្ទបរិស័ទសម័យនេះកំពុងតែថ្វាយបង្គំព្រះ ដោយឲ្យតម្លៃទ្រង់តិចឬ? សរុបសេចក្តីមក ប្រសិនបើព្រះទ្រង់ជាព្រះ តើទ្រង់មិនអាចនិពន្ធសៀវភៅមួយក្បាល ដែលគ្មានកំហុសទេឬអី? ជាការពិតណាស់ ទ្រង់អាច ហើយទ្រង់ក៏បាននិពន្ធហើយដែរ!
លោកប៉ុលអាចប្រាប់លោកធីម៉ូថេ ដោយទំនុកចិត្តថា “តែឯអ្នក ចូរឲ្យអ្នកនៅជាប់ក្នុងសេចក្តីដែលអ្នកបានរៀន ហើយជឿប្រាកដវិញ ដោយដឹងថា អ្នកបានរៀនសេចក្តីនោះពីអ្នកណា ហើយថា តាំងពីក្មេងតូចមក អ្នកបានស្គាល់បទគម្ពីរទាំងប៉ុន្មាន ដែលអាចនឹងនាំឲ្យអ្នកមានប្រាជ្ញាដល់ទីសង្គ្រោះ ដែលបានដោយសារសេចក្តីជំនឿជឿដល់ព្រះគ្រីស្ទយេស៊ូវផង ” (២ធីម៉ូថេ ៣:១៤-១៥)។
ហេតុអ្វីបានជាលោកប៉ុលអាចនិយាយដូច្នេះ? ពីព្រោះគ្រប់ទាំងបទគម្ពីរ គឺព្រះបណ្តាលឲ្យតែង ហើយមានអំណាចដោយព្រោះព្រះគម្ពីរ ជាព្រះបន្ទូលរបស់ព្រះ មិនមែនជាពាក្យសម្តីរបស់មនុស្សទេ។ លោកពេត្រុសក៏បានមានប្រសាសន៍ផងដែរថា “ដ្បិតដែលយើងខ្ញុំបានឲ្យអ្នករាល់គ្នាស្គាល់ ដល់ព្រះចេស្តានៃព្រះយេស៊ូវគ្រីស្ទ ជាព្រះអម្ចាស់នៃយើង និងដំណើរដែលទ្រង់យាងមក នោះមិនមែនតាមរឿងព្រេងប្រឌិតដោយដំរិះនោះទេ គឺយើងខ្ញុំជាស្មរបន្ទាល់ ដែលបានឃើញឫទ្ធានុភាពរបស់ទ្រង់ជាក់នឹងភ្នែកវិញ” (២ពេត្រុស ១:១៦)។
ព្រះគម្ពីរមានសញ្ញាបញ្ជាក់ថា អ្វីដែលមានចែងក្នុងព្រះគម្ពីរគឺជាពាក្យពិត។ គ្មានសៀវភៅណាផ្សេងទៀត ដែលព្រះជាម្ចាស់បានរាប់ជាសេចក្តីពិត ដូចព្រះគម្ពីរប៊ីបឡើយ។
លោក អាថើរ ធី ភៀសសាន់ (Arthur T. Pierson) ដែលជាអ្នកបកស្រាយព្រះគម្ពីរដ៏ល្បីល្បាញម្នាក់ បានពន្យល់អំពីលក្ខណៈពិសេសរបស់ព្រះគម្ពីរ យ៉ាងដូចនេះថា “ក្នុងចំណោមស្នាដៃនិពន្ធទាំងអស់ ដែលមនុស្សរាប់ថា មានអំណាច ហើយទោះជាពួកគេមានការទុកចិត្តយ៉ាងណាក៏ដោយ ក៏ទីបំផុត យើងត្រូវត្រឡប់ទៅរកព្រះបន្ទូលព្រះ ដែលមានការបង្រៀន ដែលជាក់លាក់ និងច្បាស់លាស់ ពេញដោយអំណាច និងមិនមានកំហុស គឺមិនមែនជាពាក្យសម្តីដែលមិនច្បាស់លាស់ ធ្វើឲ្យភ័ន្តច្រឡំ និងមិនអាចទុកចិត្តបាននោះឡើយ”។ យើងអាចទុកចិត្តលើព្រះបន្ទូលព្រះបាន!
បើព្រះមិនអាចសរសេរសៀវភៅមួយក្បាល ដែលល្អឥតខ្ចោះទេនោះ ហេតុអ្វីបានជាយើងទទួលជឿទ្រង់ ដើម្បីឲ្យបានសេចក្តីសង្រ្គោះ? ខ្ញុំមិនមែនមានន័យថា យើងបានទទួលសេចក្តីសង្រ្គោះ ដោយសារយើងជឿថា ព្រះគម្ពីរជាពាក្យដែលព្រះបណ្តាលឲ្យតែងនោះទេ តែខ្ញុំចង់និយាយថា ដើម្បីពិសោធនូវសិទ្ធិអំណាច និងព្រះចេស្តា និងការប្រកបជាមួយព្រះ ក្នុងដំណើរជីវិតរបស់យើងជាគ្រីស្ទបរិស័ទ យើងត្រូវតែទទួលស្គាល់ថា ព្រះគម្ពីរ ជាព្រះបន្ទូលរបស់ព្រះ។
ការមានសេចក្តីជំនឿចំពោះអំណាចដ៏ពេញលេញ នៃព្រះគម្ពីរ គឺសំខាន់ ចំពោះការរស់នៅក្នុងជីវិតជាគ្រីស្ទបរិស័ទ ដែលពិតប្រាកដ និងមានជ័យជម្នះ។ មានតែតាមរយៈសេចក្តីជំនឿដូចនោះទេ ទើបយើងអាចពិសោធនូវសេចក្តីអំណរ ក្នុងនាមជាកូនព្រះ។
ការជញ្ជឹងគិត
- រហូតមកដល់ពេលនេះ តើអ្នកមានទស្សនៈបែបណា ចំពោះព្រះគម្ពីរ? តើអ្នកទទួលស្គាល់ព្រះគម្ពីរ ថាជាអំណាចដ៏ពេញលេញ មិនមានកំហុសឆ្គង ហើយត្រូវបានព្រះអម្ចាស់បណ្តាលឲ្យតែងដែរឬទេ? បើអ្នកទទួលស្គាល់ តើហេតុអ្វី ឬ បើមិនទទួលស្គាល់ តើហេតុអ្វី?
ការអនុវត្តន៍
- សូមសរសេរមូលហេតុដែលអ្នកជឿ (ឬមិនជឿ) អំណាចនៃព្រះគម្ពីរ។ ប្រសិនបើអ្នកមានសំណួរអ្វីទាក់ទងនឹងការមិនមានកំហុសឆ្គងរបស់ព្រះគម្ពីរ ឬការបណ្តាលចិត្តនៃព្រះគម្ពីរ សូមពិភាក្សាជាមួយគ្រូគង្វាលរបស់អ្នក។
ដើម្បីត្រឡប់ទៅទំព័រដើមវិញ សូចចុចពីលើ link: https://khmer-odb.org/healthy-habits/