ក្នុងអំឡុងពេលដែលកូនប្រុសរបស់ខ្ញុំ មកលេងផ្ទះ សម្រាប់រយៈពេលវែង មានពេលព្រឹកថ្ងៃមួយ គាត់ក៏បានគោះទ្វារបន្ទប់ធ្វើការរបស់ខ្ញុំ ហើយសួរខ្ញុំថា តើខ្ញុំកំពុងធ្វើអ្វី។ ខ្ញុំប្រាប់គាត់ថា “ប៉ាកំពុងរៀបចំមេរៀនសម្រាប់បង្រៀនក្នុងសាលារៀនថ្ងៃអាទិត្យ”។ បន្ទាប់មក ពេលដែលខ្ញុំពិចារណាអំពីការដែលខ្ញុំចំណាយពេលជាច្រើន ក្នុងបន្ទប់ធ្វើការនោះ ខ្ញុំក៏ប្រាប់គាត់ថា “ប៉ាហាក់ដូចជា តែងតែរៀបចំខ្លួនសម្រាប់ការនេះការនោះជានិច្ច”។
ខ្ញុំសូមអរព្រះគុណព្រះអម្ចាស់ ដែលបានប្រទានឲ្យខ្ញុំមានឱកាស ឈោងចាប់អ្នកដទៃ។ ទោះយ៉ាងណាក៏ដោយ យើងអាចមានការតប់ប្រម៉ល់ខ្លះៗ ពេលដែលយើងចេះតែរៀបចំអ្វីមួយ សម្រាប់អ្នកដទៃជានិច្ចនោះ។ យើងមានការពិបាកនៅក្នុងការដាក់អាទិភាព ពេលដែលគំនិតរបស់យើង ទទួលរងសំពាធនៃការរៀបចំមេរៀន សេចក្តីអធិប្បាយ ឬឯកសារអ្វីមួយឥតឈប់ឈរនោះ។ ការត្រៀមខ្លួនឥតឈប់ឈរនេះ បានធ្វើឲ្យខ្ញុំមានចម្ងល់ ដូចនេះ ខ្ញុំក៏បើកមើលព្រះគម្ពីរ ដើម្បីរកមើលបទគម្ពីរដែលនិយាយអំពីការនេះ។ ខ្ញុំក៏រកឃើញថា ព្រះបានត្រាស់ហៅយើង ឲ្យមានការត្រៀមខ្លួនជានិច្ច។ សូមយើងពិចារណាអំពីចំណុចសំខាន់ៗ ដែលទាក់ទងនឹងការត្រៀមខ្លួន ដែលមានដូចតទៅ : ចិត្តដែលមានការប្តេជ្ញាថ្វាយព្រះ ត្រូវតែមានការត្រៀមខ្លូនបម្រើទ្រង់ (១សាំយ៉ូអែល ៧:៣)។ យើងត្រូវត្រៀមខ្លួនធ្វើការល្អ(២ធីម៉ូថេ ២:២១) ហើយការពារសេចក្តីពិតនៃព្រះគម្ពីរ(១ពេត្រុស ៣:១៥)។ ហើយសាវ័កប៉ុលបានរំឭកយើងថា សូម្បីតែការធ្វើអំណោយឲ្យអ្នកដទៃ ក៏យើងត្រូវមានគម្រោងផងដែរ(២កូរិនថូស ៩:៥)។
នេះគ្រាន់តែជាចំណុចចាប់ផ្តើមប៉ុណ្ណោះ។ ដើម្បីឲ្យយើងអាចរស់នៅ ក្នុងជីវិតដែលព្រះអម្ចាស់សព្វព្រះទ័យ យើងត្រូវមានការត្រៀមខ្លួនខាងផ្លូវចិត្ត ផ្លូវវិញ្ញាណ និងផ្លូវកាយ។ តែយើងមិនចាំបាច់ត្រូវមានការតប់ប្រម៉ល់នោះឡើយ ព្រោះទ្រង់នឹងជួយយើង ដោយអំណាចចេស្តាទ្រង់។ សូមយើងទូលសូមឲ្យព្រះដឹកនាំយើង ខណៈពេលដែលយើងត្រៀមខ្លួនបម្រើ ថ្វាយព្រះកិត្តិនាម និងប្រាប់អ្នកដទៃអំពីទ្រង់។–Dave Branon