ក្មេងប្រុសឈ្មោះ ឡាញនើស វែន ភែល(Linus Van Pelt) ដែលមានឈ្មោះហៅខ្លីថា “ឡាននើស” (Linus) ជាតួឯកក្នុងសៀវភៅរឿងប្រឌិត ដែលមានចំណងជើងថា សណ្តែកដី ។ វាមានភាពឈ្លាវឆ្លាតណាស់ តែវាចេះតែមានអារម្មណ៍ថា ខ្វះសុវត្ថិភាពក្នុងការរស់នៅ បានជាវាយកភួយសុវត្ថិភាពដាក់តាមខ្លួនជានិច្ច។ រឿងនេះងាយយល់ទេ ព្រោះជាញឹកញាប់ យើងក៏មានការភ័យខ្លាច និងមានអារម្មណ៍ថា ខ្វះសុវត្ថិភាពផងដែរ។
យ៉ាងណាមិញ សាវ័កពេត្រុសធ្លាប់បានពិសោធនឹងការភ័យខ្លាច នៅក្នុងពេលដ៏សំខាន់។ ពេលគេចាប់ខ្លួនព្រះយេស៊ូវ លោកពេត្រុសក៏បានបង្ហាញចេញនូវចិត្តក្លាហាន ដោយតាមព្រះអម្ចាស់ ទៅដល់ទីជំនុំរបស់សម្តេចសង្ឃ។ ប៉ុន្តែ បន្ទាប់មក គាត់ក៏ចាប់ផ្តើមមានការភ័យខ្លាច ដោយនិយាយកុហក់ ដើម្បីលាក់បាំងអត្តសញ្ញាណរបស់គាត់(យ៉ូហាន ១៨:១៥-២៦)។ គាត់បាននិយាយពាក្យសម្តីដ៏អាប់ឱន ដោយបដិសេធព្រះអម្ចាស់របស់គាត់។ ប៉ុន្តែ ព្រះយេស៊ូវមិនដែលឈប់ស្រឡាញ់លោកពេត្រុសឡើយ ហើយទីបំផុត ទ្រង់ក៏បានស្អាងគាត់ឡើង(មើល យ៉ូហាន ២១:១៥-១៩)។
ក្រោយមក ក្នុងបទគម្ពីរ១ពេត្រុស ៤:៩ សាវ័កពេត្រុសបាននិយាយសង្កត់ធ្ងន់ អំពីសេចក្តីស្រឡាញ់របស់អ្នក ដែលបានពិសោធនឹងសេចក្តីស្រឡាញ់ដ៏ជ្រាលជ្រៅរបស់ព្រះយេស៊ូវ។ ហើយបន្ទាប់មក គាត់ក៏បានប្រើពាក្យ “មុនដំបូងបង្អស់” ដើម្បីនិយាយសង្កត់ធ្ងន់អំពីសារៈសំខាន់នៃសេចក្តីស្រឡាញ់ ក្នុងទំនាក់ទំនងរបស់យើង។ បន្ទាប់មក ខគម្ពីរនេះបានលើកទឹកចិត្ត ឲ្យយើង “មានសេចក្តីស្រឡាញ់គ្នា ឲ្យអស់ពីចិត្ត ដ្បិតសេចក្តីស្រឡាញ់នឹងគ្របបាំងអំពើបាបជាអនេកអនន្ត”។
តើអ្នកត្រូវការ “ភួយសុវត្ថិភាព” ដើម្បីគ្របបាំងខ្លួនរបស់អ្នកឬទេ? បន្ទាប់ពីខ្ញុំបាននិយាយ ឬធ្វើអ្វីមួយ ដែលធ្វើឲ្យខ្លួនឯងស្តាយក្រោយ ខ្ញុំមានអារម្មណ៍ថា មានកំហុស ហើយខ្មាសអៀន។ ដូចនេះខ្ញុំក៏ត្រូវការ “ការគ្របបាំង” ដូចដែលព្រះយេស៊ូវបានគ្របបាំងមនុស្សដែលមានភាពអាប់ឱន និងក្តីអាម៉ាស។
សម្រាប់អ្នកដើរតាមព្រះយេស៊ូវ សេចក្តីស្រឡាញ់ គឺប្រៀបបាននឹងភួយ ដែលត្រូវចែកឲ្យអ្នកដទៃ ដោយព្រះគុណ និងសេចក្តីក្លាហាន ដើម្បីកម្សាន្តចិត្ត និងឈោងចាប់អ្នកដទៃ។ ក្នុងនាមជាអ្នកទទួលសេចក្តីស្រឡាញ់ដ៏អស្ចារ្យរបស់ព្រះ ចូរយើងធ្វើខ្លួនជាអ្នកផ្តល់ឲ្យនូវក្តីស្រឡាញ់ដល់អ្នកដទៃ។-ARTHUR JACKSON